மீண்டும் சூடுபிடிக்கும் அமெரிக்க-சீன வர்த்தகப் போர்! டிரம்ப்பின் அதிரடி அறிவிப்பு

அமெரிக்க ஜனாதிபதியாக பதவியேற்ற டொனால்டு டிரம்ப், பதவியேற்ற நாள் முதலே அதிரடி நடவடிக்கைகளை மேற்கொண்டு வருகிறார்.

குறிப்பாக அவரது வரி விதிப்பு நடவடிக்கைகள் உலக அரங்கில் கடுமையான தாக்கத்தை ஏற்படுத்தி வருகின்றன.

டொனால்ட் டிரம்ப், தன்னுடன் ஏர் ஃபோர்ஸ் ஒன்னில் பயணம் செய்த செய்தியாளர்களிடம், திங்கட்கிழமை அனைத்து எஃகு மற்றும் அலுமினிய இறக்குமதிகளுக்கும் 25% வரிகளை அறிவிப்பதாக தெரிவித்தார்.

செவ்வாய்க்கிழமை நாடுகள் மீதான பரஸ்பர வரிகள் குறித்து அறிவிப்பு வெளியாகும் என்றும் அவர் கூறினார், ஆனால் எந்த நாடுகள் குறிவைக்கப்படும் என்பதை அவர் குறிப்பிடவில்லை.

“அவர்கள் எங்களிடம் கட்டணம் வசூலித்தால், நாங்கள் அவர்களிடம் கட்டணம் வசூலிப்போம்” என்று டிரம்ப் கூறினார்.

மெக்சிகோ மற்றும் கனடாவில் இருந்து இறக்குமதியாகும் பொருட்களுக்கு 25 சதவீதமும், சீனா பொருள்களுக்கு 10 சதவீதமும் வரி விதிப்பு பிப்ரவரி 1-ம் தேதி முதல் அமலுக்கு வரும் என்று டிரம்ப் அறிவித்திருந்தார்.

மெக்சிகோவும் கனடாவும் புலம்பெயர்வு மற்றும் பெண்டனில் போதைப் பொருள் கடத்தலுக்கு எதிராக கடுமையான நடவடிக்கை எடுக்கும் வரை இந்த நடவடிக்கைத் தொடரும் என்றும் தெரிவித்திருந்தார். ஆனால் கனடாவும், மெக்சிகோவும் கடைசி நேரத்தில் டிரம்ப் கூறிய நடவடிக்கைகளுக்கு உத்தரவாதம் அளித்த நிலையில் வரி விதிப்பு ஒருமாத காலம் நிறுத்தி வைக்கப்பட்டது.

புதிய கட்டணங்கள் குறித்து அமெரிக்காவிடமிருந்து எந்த அதிகாரப்பூர்வ அறிவிப்பும் வரவில்லை என்று ஐரோப்பிய ஒன்றியம் கூறுகிறது, மேலும் ஆஸ்திரேலிய பிரதமர் டிரம்புடன் கலந்துரையாட திட்டமிட்டுள்ளார்.

டிரம்பின் புதிய வரி விதிப்பு நடவடிக்கைகளால் பல்வேறு நாடுகளின் கரன்சி மதிப்பு குறையத் தொடங்கி உள்ளது. உலகளாவிய பங்குச்சந்தைகளில் நிலையற்ற தன்மை காணப்படுகிறது. தங்கம் விலை உயர்ந்து வருகிறது. டிரம்பின் நடவடிக்கையால் உலக அளவில் வர்த்தக போர் குறித்த கவலை அதிகரித்துள்ளது.