சீரற்ற வானிலை : 193 பேர் உயிரிழப்பு, 200இற்கும் மேற்பட்டோர் மாயம்!

கடந்த சில நாட்களாக நாட்டில் நிலவும் மோசமான வானிலை காரணமாக உயிரிழந்தவர்களின் எண்ணிக்கை 193 ஆக உயர்ந்துள்ளதாக பேரிடர் மேலாண்மை மையம் (DMC) உறுதிப்படுத்தியுள்ளது.

பேரிடர் மேலாண்மை மையம் (DMC)  இன்று வெளியிட்ட அறிவிப்பின்படி, இந்த தகவல் வெளியாகியுள்ளது.

அதிகபட்சமாக பதுளை மாவட்டத்தில்  71 பேர் பலியாகியுள்ளனர். குறைந்தது 228 பேர் காணாமல் போயுள்ளதாகவும், அவர்களை தேடும் பணி தொடர்ந்து நடைபெற்று வருவதாகவும் அறிவிக்கப்பட்டுள்ளது.

சமீபத்திய தரவுகளின்படி, 25 மாவட்டங்களில் 266,114 குடும்பங்களைச் சேர்ந்த மொத்தம் 968,304 பேர் பாதிக்கப்பட்டுள்ளதாக உறுதிப்படுத்தப்பட்டுள்ளது.

அத்துடன் நாடு முழுவதும் அமைக்கப்பட்டுள்ள 1,094 பாதுகாப்பான முகாம்களில் 41,005 குடும்பங்களைச் சேர்ந்த 147,931 பேர் தற்போது தங்க வைக்கப்பட்டுள்ளனர்.

இதேவேளை, “டிட்வா” சூறாவளி தற்போது யாழ்ப்பாணத்திலிருந்து வடகிழக்கே சுமார் 170 கி.மீ தொலைவில் அட்சரேகை 11.1°வடக்கிலும் தீர்க்கரேகை 80.6°கிழக்கு திசையிலும் மையம் கொண்டுள்ளது. மேலும் இது இலங்கையிலிருந்து வடக்கு நோக்கி நகர்ந்து இலங்கைக்கு அப்பால் செல்ல வாய்ப்புள்ளது என்று வானிலை ஆய்வுத் துறை தெரிவித்துள்ளது.