பயங்கரவாதத் தடுப்புச் சட்டத்தை சீர்திருத்துவதில் உறுதியாக இருக்கும் ஜனாதிபதி!

பயங்கரவாதத் தடுப்புச் சட்டம் (PTA) மற்றும் கட்டுப்படுத்தப்பட்ட ஆன்லைன் பாதுகாப்புச் சட்டம் போன்ற சட்டங்களை சீர்திருத்துவதில் தான் உறுதியாக இருப்பதாக ஜனாதிபதி தெரிவித்துள்ளார்.

நியூஸ் வீக்கிற்கு அளித்த பிரத்தியேக நேர்காணலில் இவ்வாறு குறிப்பிட்டுள்ளார்.

இதன்போது மேலும் கருத்து வெளியிட்ட அவர்,  “இந்தச் சட்டங்கள் அடக்குமுறைக்கான கருவிகளாகப் பயன்படுத்தப்பட்டுள்ளன. அவை  ஜனநாயகத்திற்கு பொருத்தமற்றவை.

பல தசாப்தங்களாக கட்டமைக்கப்பட்ட அமைப்புகளை நாங்கள் அகற்ற முயற்சிக்கிறோம். கட்டுப்பாட்டு அரசியல் கலாச்சாரம் மற்றும் நிறுவனப் பழக்கவழக்கங்கள் ஒரே இரவில் மாறாது. அதற்கு தொடர்ச்சியான முயற்சி தேவை. நாம் சரியான திசையில் நகர்கிறோமா, நமது சீர்திருத்தங்கள் கணிசமானவையா என்பதை எங்கள் கூட்டாளிகள் பார்க்க வேண்டும்.

கடந்த கால உரிமை மீறல்களை நிவர்த்தி செய்வதற்கான ஒரு செயல்முறையில் பாதிக்கப்பட்டவர்களின் குழுக்கள், சிவில் சமூக அமைப்புகள் மற்றும் உள்ளூர் நிபுணர்களுடன் அதிகாரிகள் பணியாற்றி வருகின்றனர்” எனத் தெரிவித்துள்ளார்.