தன் அலட்சியத்தால் 3.5 கோடி ரூபாய் காரை கண்டம் செய்த பிளாக் பேந்தர் பட நடிகர்(வீடியோ)

ஹாலிவுட் நடிகர் மைக்கேல் பி.ஜோர்டன் தனது 3.5 கோடி ரூபாய் மதிப்பிலான ஃபெராரி காரை, அலட்சியத்தால் சேதமாக்கியது தொடர்பான வீடியோ இணையத்தில் வைரலாகி வருகிறது.

’பிளாக் பேந்தர்’ மற்றும் ’க்ரீட்’ வரிசைத் திரைப்படங்கள் வாயிலாக உலகம் முழுக்க அறியப்பட்ட ஹாலிவுட் நடிகர் மைக்கேல் பி.ஜோர்டன். குழந்தை நட்சத்திரமாக அறிமுகமாகி, ஆக்‌ஷன் நாயகனாக தனது இருப்பை ஹாலிவுட்டில் தக்கவைத்திருக்கிறார். உலகில் தற்போது இருப்பவர்களில் ’கவர்ச்சியான மனிதர்’ என்ற பீப்பிள் பத்திரிக்கையின் பெருமையை 2 ஆண்டுகளுக்கு முன்னர் பெற்றிருந்தார். தற்போது க்ரீட் வரிசை திரைப்படங்களின் அடுத்த தவணைக்கு மும்முரமாக தயாராகி வருகிறார்.

இந்நிலையில் லாஸ் ஏஞ்சல்ஸ் நகரில், வேண்டுமென்றே விபத்தை ஏற்படுத்திய வழக்கில் பொலிஸ் பிடியில் மைக்கேல் ஜோர்டன் சிக்கியிருக்கிறார். நிறுத்தப்பட்டிருந்த ஒரு கார் மீது தனது ஃபெராரி காரை மோதச் செய்ததில் பொலிஸார் அவரை வளைத்துள்ளனர். சனியன்று நள்ளிரவு நிகழ்ந்த இந்த சம்பவத்தில் எவருக்கும் எந்த வகையிலும் பாதிப்பு ஏதும் ஏற்படவில்லை. மைக்கேலிடம் மேற்கொள்ளப்பட்ட மருத்துவ சோதனையிலும், போதைப்பொருள் அல்லது மது உள்ளிட்ட போதைகளின் அறிகுறிகளை பொலிஸாரால் சேகரிக்க முடியவில்லை.

https://twitter.com/i/status/1731325567465652325

இருந்தபோதும், நின்று கொண்டிருந்த கியா கார் மீது, தனது ஃபெராரியை மைக்கேல் ஜோர்டன் மோதச் செய்தது ஏன் என்பது குறித்து பொலிஸார் தீவிரமாக விசாரித்து வருகின்றனர். இது தொடர்பான கேள்விகள் மற்றும் விசாரணைக்கு மைக்கேல் ஜோர்டன் போதிய ஒத்துழைப்பு வழங்கவில்லை என்றும் பொலிஸார் தெரிவித்துள்ளனர்.

கியா மீது மோதச்செய்த மைக்கேல் ஜோர்டனின் ஃபெராரி காரின் மதிப்பு, இந்திய செலவாணியில் ரூ.3.5 கோடியாகும். அத்தனை விலை உயர்ந்த வாகனத்தை, அலட்சியமாக அவர் கையாண்ட விதத்தை சமூக ஊடகங்களில் ரசிகர்கள் சாடி வருகின்றனர். சினிமா ஹீரோவான மைக்கேல் ஜோர்டன் தன்னை நிஜத்திலும் பாவித்துக்கொண்டதால் ஏற்பட்ட இழப்பு இதுவென்று ஒரு ரசிகர் சாடியுள்ளார்.