இலங்கை – சிறைச்சாலை மருத்துவமனையில் இருந்து கொழும்பு தேசிய மருத்துவமனைக்கு மாற்றப்பட்டார் ரணில்!

சிறைச்சாலை மருத்துவமனையில் சிகிச்சை பெற்று வந்த முன்னாள் ஜனாதிபதி ரணில் விக்ரமசிங்க, கொழும்பு தேசிய மருத்துவமனைக்கு மாற்றப்பட்டுள்ளார்.

இன்று அவரை பரிசோதித்த சிறைச்சாலை மருத்துவர்கள் அவரது உடல்நிலையை மதிப்பிட்டு இந்த இடமாற்றத்தை பரிந்துரைத்ததாக தகவல்கள் தெரிவிக்கின்றன.

குற்றப் புலனாய்வுத் துறையினரால் (CID) நேற்று கைது செய்யப்பட்டதைத் தொடர்ந்து ஆகஸ்ட் 26 ஆம் தேதி வரை விளக்கமறியலில் வைக்கப்பட்டிருந்த விக்ரமசிங்க, உயர் இரத்த அழுத்தம் மற்றும் இரத்த சர்க்கரை அளவு அதிகரித்ததால் மருத்துவ ஆலோசனையின் பேரில் நேற்று (22) இரவு சிறைச்சாலை மருத்துவமனையில் அனுமதிக்கப்பட்டார்.

அவரது உடல்நிலையை தொடர்ந்து கண்காணித்து வரும் சிறைச்சாலை மருத்துவர்கள், அவருக்கு வீட்டில் சமைத்த உணவு வழங்க பரிந்துரைத்துள்ளனர்.

இது தொடர்பாக சிறைச்சாலை தலைமையகத்தின் ஒப்புதல் வழங்கப்பட்டுள்ளதாக மேலும் தெரிவிக்கப்படுகிறது.

அதன்படி, முன்னாள் ஜனாதிபதி விக்ரமசிங்கவின் உடல்நிலை காரணமாக அவரை கொழும்பு தேசிய மருத்துவமனைக்கு மாற்ற சிறை அதிகாரிகள் முடிவு செய்திருந்தனர்.