தென் கொரிய யூடியூபர் நீதிமன்றத்தின் முன் கத்தியால் குத்தி கொலை

தென் கொரிய யூடியூபர் ஒருவர் பூசன் மாவட்ட நீதிமன்றத்திற்கு வெளியே நேரலை ஸ்ட்ரீமிங் செய்யும் போது கத்தியால் குத்தப்பட்டார்.

50 வயதுடைய யூடியூபர், ஒரு விசாரணைக்காக நீதிமன்றம் வந்ததாக அறியப்படுகின்றது, அதே நேரத்தில் மற்றொரு யூடியூபர், அவரைப் பின்னால் வந்து கத்தியால் குத்தினார் என்று தெரிவிக்கப்பட்டுள்ளது.

பாதிக்கப்பட்டவரின் கிட்டத்தட்ட 4,000 சந்தாதாரர்களுக்கு நேரடியாக ஒளிபரப்பப்பட்ட இந்த தாக்குதல், இரண்டு யூடியூபர்களுக்கு இடையேயான ஆன்லைன் பகையின் விளைவாக இருக்கலாம் என நம்பப்படுகிறது.

சந்தேக நபர் ஆயுதம் ஒன்றை கொள்வனவு செய்து வாகனத்தை வாடகைக்கு எடுத்துச் சென்றதாகக் கூறப்படும் நிலையில், இந்தத் தாக்குதல் திட்டமிடப்பட்டதாக பொலிஸார் சந்தேகிக்கின்றனர்.

பாதிக்கப்பட்டவர் உடனடியாக அருகிலுள்ள மருத்துவமனைக்கு கொண்டு செல்லப்பட்டார், ஆனால் வந்த சிறிது நேரத்திலேயே அவர் இறந்துவிட்டார் என்று அறிவிக்கப்பட்டது.

சந்தேக நபர் அங்கிருந்து தப்பி ஓடிவிட்டார், ஆனால் வடக்கு கியோங்சாங் மாகாணத்தின் கியோங்ஜுவில் பொலிஸாரால் கைது செய்யப்பட்டார்.

பாதிக்கப்பட்டவர் மற்றும் சந்தேக நபரின் அடையாளங்களை அதிகாரிகள் இன்னும் வெளியிடவில்லை.

இருப்பினும்,குற்றவாளி ஹாங் என்ற குடும்பப்பெயரால் அடையாளம் காணப்படுகிறார், அதே நேரத்தில் பாதிக்கப்பட்டவர் ஜோ என்ற குடும்பப்பெயரால் அறியப்படுகிறார்.