இலங்கையில் தமிழர் தரப்பு பிரிந்து செயற்பட்டால் ஆபத்து – செல்வம் அடைக்கலநாதன் எச்சரிக்கை

தமிழர் தரப்பு பிரிந்து செயற்படுமாயின், எதிர்காலத்தில் தங்களது பிரதிநிதித்துவத்துக்கு பாரிய ஆபத்து ஏற்படும் என எச்சரிக்கை விடுக்கப்பட்டுள்ளது.

டெலோ என்ற தமிழீழ விடுதலை இயக்கத்தின் தலைவர் செல்வம் அடைக்கலநாதன் இதனை தெரிவித்துள்ளார்.

வவுனியாவில் நேற்று இடம்பெற்ற செய்தியாளர் சந்திப்பில் கலந்துகொண்டு அவர் இதனைக் குறிப்பிட்டுள்ளார்.

இதன்போது, இந்திய உயர்ஸ்தானிகருடனான சந்திப்பு தொடர்பில் கருத்து தெரிவித்த அவர், தமிழர் தரப்பு ஒற்றுமையாகச் செயற்பட்டு, அதிக பிரதிநிதித்துவத்தைப் பெற வேண்டும் என்பதையே இந்திய அரசும் வலியுறுத்தியுள்ளதாகக் குறிப்பிட்டுள்ளார்.

இதேவேளை, இலங்கை தமிழரசுக் கட்சியின் கோரிக்கைக்கு அமைய, ஓரணியில் போட்டியிடுவதாயின் வீடு அல்லது குத்துவிளக்கு அல்லாத ஒரு பொது சின்னத்தில் களமிறங்குவது பொருத்தமானதாக இருக்கும் எனவும் செல்வம் அடைக்கலநாதன் தெரிவித்துள்ளார்.