இலங்கையில் மீண்டும் ஜனாதிபதியாகும் முயற்சியில் ரணில்

எதிர்வரும் ஜனாதிபதித் தேர்தலில் ஜனாதிபதி ரணில் விக்கிரமசிங்க நிச்சயம் போட்டியிடுவார் என தொழில் மற்றும் வெளிநாட்டு வேலைவாய்ப்பு அமைச்சர் மனுஷ நாணயக்கார தெரிவித்துள்ளார்.

ஆனால் இந்த நேரத்தில் எடுக்கப்படும் முடிவுகள் தேர்தலை இலக்காகக் கொள்ளாமல் பொருளாதாரம் மற்றும் மக்களுக்கு நன்மை பயக்கும் எதிர்கால நோக்கை அடிப்படையாகக் கொண்டவை என அமைச்சர் ஊடகங்களில் தெரிவித்தார்.

மோட்டார் ஆணையாளர் திணைக்களத்தின் வருமானத்தை அதிகரிப்பதற்காக முன்வைக்கப்பட்ட யோசனைகளை நடைமுறைப்படுத்துவதற்கு ஒரு வருடத்திற்கும் மேலாக காத்திருக்க வேண்டியுள்ளதாகவும், புதிய திட்டத்தை நடைமுறைப்படுத்தாத அதிகாரிகளுக்கு எதிராக வழக்குத் தாக்கல் செய்யப்பட வேண்டும் என்றும் தொழிலாளர் மற்றும் வெளிநாட்டு வேலைவாய்ப்பு அமைச்சர் தெரிவித்துள்ளார்.

புதிய பிரேரணைகளுக்கு அங்கீகாரம் வழங்காததன் காரணமாக அரசாங்கம் இழந்த பணத்தை அவர்களிடமிருந்து மீளப் பெற்றுக் கொள்ள வேண்டுமென அமைச்சர் தெரிவித்துள்ளார்.

எதிர்வரும் தேர்தலில் போட்டியிடும் விதம் தொடர்பில் இறுதித் தீர்மானம் எடுக்கப்படும் என குறிப்பிட்ட அமைச்சர், இந்த நாட்டின் பொருளாதார நிலைமையை அபிவிருத்தி செய்யும் திறன் தற்போதைய ஜனாதிபதிக்கு மாத்திரமே உள்ளது எனவும் தெரிவித்தார்.