ஜனாதிபதியின் இலக்கு அடுத்த தலைமுறைக்கு நல்லிணக்க பணியை வழங்குவது அல்ல – சமன் ஏக்கநாயக்க
இலங்கையில் நல்லிணக்கத்தை அடுத்த தலைமுறைக்குக் கொடுப்பது அல்ல, அதற்கு இப்போதே தீர்வு காண்பதே ஜனாதிபதி ரணில் விக்கிரமசிங்கவின் இலக்காகும் என ஜனாதிபதியின் செயலாளர் சமன் ஏக்கநாயக்க தெரிவித்துள்ளார்.
நல்லிணக்கச் செயற்பாடுகள் தொடர்பிலான பிரச்சினைகளுக்கு தீர்வுகாண வேண்டிய தேவை வலுவாக உள்ளதாகவும், இந்த முயற்சி வெற்றியடையும் பட்சத்தில் மேலும் ஒரு வருடத்திற்கு ஜெனிவாவில் நடைபெறவுள்ள ஐ.நா மனித உரிமைகள் பேரவைக்கு நாடு செல்ல வேண்டிய அவசியமில்லை எனவும் ஜனாதிபதியின் செயலாளர் சுட்டிக்காட்டியுள்ளார்.
ஜனாதிபதியின் ஊடகப் பிரிவு இதனை (PMD) தெரிவித்துள்ளது.
வெளிவிவகார அமைச்சர் அலி சப்ரி தலைமையில் நேற்று (11) ஜனாதிபதி செயலகத்தில் நடைபெற்ற உண்மை மற்றும் நல்லிணக்கப் பொறிமுறை தொடர்பான சிவில் சமூக விழிப்புணர்வு கலந்துரையாடலின் போதே சமன் ஏக்கநாயக்க மேற்கண்டவாறு தெரிவித்தார்.
வெளிவிவகார அமைச்சர் உண்மை மற்றும் நல்லிணக்க பொறிமுறையின் நோக்கங்களை விளக்கினார், மேலும் உண்மை மற்றும் நல்லிணக்க ஆணைக்குழுவின் பங்கு பற்றி விரிவாக விவாதிக்கப்பட்டது.
ஆணைக்குழு ஸ்தாபனத்தின் நோக்கங்களை நிறைவேற்றுவது தொடர்பில் கலந்துகொண்ட சிவில் அமைப்புக்களின் உறுப்பினர்களின் கருத்துக்களையும் ஆலோசனைகளையும் கேட்டறிந்த ஏக்கநாயக்க, நல்லிணக்கச் செயற்பாடுகளை வெற்றியடையச் செய்வதற்கு அனைவரினதும் ஆதரவை எதிர்பார்ப்பதாகவும் அவர் மேலும் தெரிவித்தார்.
ஒரு நாடாக முன்னேற அனைத்து குடிமக்களின் உடன்பாடும் ஆதரவும் அவசியம் என்றும் அவர் மேலும் வலியுறுத்தியுள்ளார்
(Visited 6 times, 1 visits today)
