ராஜபக்ச ஆட்சிக்கு ‘இராஜதந்திர தலையிடி’ கொடுத்த தூதுவரை சந்தித்தார் மஹிந்த!

முன்னாள் ஜனாதிபதி மஹிந்த ராஜபக்சவை, இலங்கைக்கான அமெரிக்க தூதுவர் ஜுலி சங் இன்று சந்தித்து பேச்சு நடத்தினார்.

இலங்கைக்கான அமெரிக்க தூதுவராக செயல்படும் ஜுலி சங், எதிர்வரும் 16 ஆம் திகதி தாயகம் திரும்புகின்றார்.

தனது இராஜதந்திர பணியை முடித்துக்கொண்டு திரும்பும் அவர், கடந்த சில நாட்களாக முக்கியத்துவமிக்க சந்திப்புகளை கொழும்பில் நடத்தி வருகின்றார்.

ஜனாதிபதி அநுரகுமார திஸாநாயக்கவை நேற்று சந்தித்திருந்தார்.

இந்நிலையில் முன்னாள் ஜனாதிபதி மஹிந்த ராஜபக்சவுடன் அவர் இன்று பேச்சு நடத்தினார்.

“ அமெரிக்க-இலங்கை கூட்டாண்மை குறித்து விவாதித்தோம்.” என்று அமெரிக்க தூதுவர் குறிப்பிட்டுள்ளார்.

இலங்கையில் இடம்பெற்ற மக்கள் புரட்சியின்போது (அறகலய) ஜுலி சங்தான் அமெரிக்க தூதுவராக செயல்பட்டார்.

அப்போது கோட்டாபய ராஜபக்ச ஜனாதிபதியாகவும், மஹிந்த ராஜபகச் பிரதமராகவும் பதவி வகித்தனர்.

அறகலயவின் பின்னணியில் அமெரிக்க தூதுவரும் இருந்தார் என மஹிந்தவின் சகாக்கள் குற்றஞ்சாட்டி இருந்தனர் என்பது குறிப்பிடத்தக்கது.

அதேவேளை, மஹிந்த ராஜபக்ச ஜனாதிபதியாக பதவி வகித்த காலப்பகுதியில் ஐ.நா. மனித உரிமைகள் பேரவைக் கூட்டத்தொடர் மற்றும் சர்வதேச களத்தில் அமெரிக்கா கடும் இராஜதந்திர அழுத்தங்களைப் பிரயோகித்திருந்தது.

மறுபுறத்தில் பஸில் ராஜபக்ச, கோட்டாபய ராஜபக்ச ஆகியோருக்கு அமெரிக்க குடியுரிமை இருந்தது. ஜனாதிபதி தேர்தலில் களமிறங்குவதற்காக அமெரிக்க குடியுரிமையை கோட்டாபய ராஜபக்ச துறந்தார் என்பது தெரிந்ததே.