சக அமைச்சர்களுக்கு உள்துறைச் செயலாளர் ஷபானா மஹ்மூத் எச்சரிக்கை

பிரித்தானியாவின் ஆளும் லேபர் கட்சிக்குள் தற்போது அரசியல் பரபரப்பு ஏற்பட்டுள்ளது.

கிரேட்டர் மான்செஸ்டர் மேயராக இருக்கும் ஆண்டி பர்ன்ஹாம் (Andy Burnham), கோர்டன் மற்றும் டென்டன் (Gorton and Denton) இடைத்தேர்தலில் போட்டியிட்டு மீண்டும் பாராளுமன்றத்திற்குத் திரும்ப விருப்பம் தெரிவித்துள்ளார்.

இது பிரதமர் கீர் ஸ்டார்மரின் தலைமைக்கு விடுக்கப்படும் சவாலாகவே பார்க்கப்படுகிறது.

இந்நிலையில், இது குறித்து கருத்து தெரிவித்துள்ள உள்துறைச் செயலாளர் ஷபானா மஹ்மூத் (Shabana Mahmood), கட்சிக்குள் தேவையற்ற “உளவியல் நாடகங்களை” (psychodrama) தவிர்க்க வேண்டும் என்று வலியுறுத்தியுள்ளார்.

கன்சர்வேடிவ் கட்சி ஆட்சியில் நிலவிய உட்கட்சிப் பூசல்களால் மக்கள் சலிப்படைந்துள்ளதைச் சுட்டிக்காட்டிய அவர், லேபர் கட்சியினர் ஒற்றுமையுடன் செயல்பட வேண்டும் எனக் கேட்டுக்கொண்டார்.

பர்ன்ஹாம் மேயர் பதவியைத் துறந்து தேர்தலில் போட்டியிட அனுமதிப்பது குறித்து லேபர் கட்சியின் தேசிய செயற்குழு (NEC) இன்று கூடி முடிவெடுக்க உள்ளது. ஒருவேளை அவர் அனுமதிக்கப்பட்டால், அது பிரித்தானிய அரசியலில் மிகப்பெரிய மாற்றங்களை ஏற்படுத்தும் என எதிர்பார்க்கப்படுகிறது.