கிர்கிஸ்தான்- மத்திய ஆசியாவின் ஆக உயரமான லெனின் உருவச்சிலை அகற்றம்

பழம்பெரும் சோவியத் புரட்சியாளர் விளாடிமிர் லெனினின் உருவச்சிலையை கிர்கிஸ்தான் அகற்றியுள்ளது.

இது, மத்திய ஆசியாவின் ஆக உயரமான லெனின் சிலை எனக் கூறப்படுகிறது.23 மீட்டர் உயரமுள்ள இந்தச் சிற்பம், சோவியத் யூனியனில் கிர்கிஸ்தான் அங்கம் வகித்திருந்தபோது எழுப்பப்பட்டது.

ஓஷ் நகரில் 50 ஆண்டுகளாக நின்றுகொண்டிருந்த உருவச்சிலை, இந்த வாரம் அகற்றப்பட்டது.

கம்யூனிசப் புரட்சியாளரான லெனினின் உருவச்சிலை தரையில் மல்லாந்து கிடக்க வைக்கப்பட்டதைக் காட்டும் படங்கள் வெளிவந்துள்ளன.

பாரந்தூக்கி ஒன்று சிலையை இறக்கி வைத்ததாகவும் பிபிசி வெளியிட்டுள்ள அறிக்கை குறிப்பிடுகிறது.

உள்கட்டமைப்புத் தேவைகளுக்காக சிலை அகற்றப்பட்டதாக உள்ளூர் அதிகாரிகள் கூறுகின்றனர். சிலையை அகற்றும் முடிவை உள்ளூர் அதிகாரிகள் மட்டுப்படுத்தியபோதும் முன்னாள் சோவியத் யூனியனிடமிருந்து பிரிந்த குடியரசுகள், தங்களது அடையாளங்களில் ரஷ்யாவுடன் கொண்டுள்ள தொடர்புகளைக் குறைக்க முற்பட்டுள்ளதாகக் கவனிப்பாளர்கள் கருதுகின்றனர்.

இந்தச் சிலைக்குப் பதிலாகக் கொடிக்கம்பம் ஒன்று அங்கு வைக்கப்படும்.சோவியத் யூனியன் 34 ஆண்டுகளுக்கு முன்னர் சிதைந்ததை அடுத்து கிர்கிஸ்தான் சுதந்திரம் பெற்றது.

சிலைகள் அகற்றப்பட்டாலும் கிர்கிஸ்தானில் சோவியத் யூனியனுடனான அதன் வரலாற்றுச் சான்றுகள் ஆங்காங்கே காணப்படுகின்றன. உதாரணத்திற்கு, அந்நாட்டின் இரண்டாவது ஆக உயரமான மலையின் பெயரே லெனின் பீக்.