2025ம் ஆண்டில் இஸ்ரேலால் 70 பாலஸ்தீனியர்கள் கொலை

இந்த ஆண்டின் தொடக்கத்தில் இருந்து ஆக்கிரமிக்கப்பட்ட மேற்குக் கரையில் இஸ்ரேலியப் படைகள் 10 குழந்தைகள் உட்பட 70 பேரைக் கொன்றுள்ளதாக பாலஸ்தீன சுகாதார அமைச்சகம் தெரிவித்துள்ளது.

அமைச்சின் கணக்கின்படி – இஸ்ரேலின் விரிவான தாக்குதல்களில் ஜெனினில் 38 பேர், டூபாஸில் 15 பேர், நப்லஸில் ஆறு பேர், துல்கரேமில் ஐந்து பேர், ஹெப்ரானில் மூன்று பேர், பெத்லகேமில் இரண்டு பேர் மற்றும் ஆக்கிரமிக்கப்பட்ட கிழக்கு ஜெருசலேமில் ஒருவர் கொல்லப்பட்டுள்ளனர்.

காசாவில் போர் நிறுத்தத்திற்குப் பிறகு, கடந்த மாதம் இஸ்ரேலிய இராணுவம் அந்தப் பகுதியில் “இரும்புச் சுவர்” என்று அழைக்கப்படும் ஒரு பெரிய தாக்குதலைத் தொடங்கியது.

ஜெனின் பகுதியில் இருந்து பாலஸ்தீன ஆயுதக் குழுக்களை குறிவைப்பதில் இந்த நடவடிக்கை குறிப்பாக கவனம் செலுத்துகிறது.

கொல்லப்பட்ட 10 குழந்தைகளுக்கு கூடுதலாக, இஸ்ரேலிய இராணுவம் ஒரு பெண்ணையும் இரண்டு வயதான பாலஸ்தீனியர்களையும் கொன்றதாக அமைச்சகம் தெரிவித்துள்ளது.

“இஸ்ரேலிய ஆக்கிரமிப்பு அதிகாரிகள் மேற்குக் கரையில் உள்ள பாலஸ்தீன மக்கள் மீது தங்கள் முழுமையான போரை விரிவுபடுத்தி, குடிமக்களை இடம்பெயர்த்து இன அழிப்பு செய்வதை நோக்கமாகக் கொண்ட தங்கள் திட்டங்களை செயல்படுத்துகின்றனர்” என்று செய்தித் தொடர்பாளர் பாலஸ்தீன ஆணையத்தின் தலைவர் நபில் அபு ருடைனே ஒரு அறிக்கையில் தெரிவித்தார்.