பிரித்தானியாவில் வீடற்றவர்களின் எண்ணிக்கை அதிகரிப்பு – சிக்கலில் தொண்டு நிறுவனங்கள்!

பிரித்தானியாவில் குளிர் கால நிலை ஆரம்பமாகியுள்ள நிலையில், தொண்டு நிறுவனங்கள் வீடற்றவர்களுக்கு தங்குமிடங்களை வழங்க தயாராகி வருவதாக தகவல் வெளியாகியுள்ளது.

வடக்கு சோமர்செட் கவுன்சில் மற்றும் பிரிஸ்டல் நகர கவுன்சில் உட்பட நாடு முழுவதும் உள்ள பல கவுன்சில்கள் தற்காலிக இடங்களை வழங்க தயாராகி வருகின்றன.

ஒருங்கிணைந்த வீடற்ற தன்மை மற்றும் தகவல் வலையமைப்பு (CHAIN) தரவுத்தளத்தால் வெளியிடப்பட்ட புள்ளிவிபரங்களில், ஏப்ரல் 2024 மற்றும் மார்ச் 2025 க்கு இடையில், லண்டனில் 13,231 பேர் வீடற்றவர்களாக அடையாளம் காணப்பட்டுள்ளனர்.

இது கடந்த ஆண்டுகளுடன் ஒப்பிடும்போது 10 சதவீதம் அதிகரிப்பை குறிக்கிறது. இது 2015/16 ஆம் ஆண்டில் காணப்பட்ட எண்ணிக்கையை விட 63 சதவீதம் அதிகம் எனவும் சுட்டிக்காட்டப்பட்டுள்ளது.

ஷெல்டர் என்ற தொண்டு நிறுவனத்தின் கூற்றுப்படி,   இங்கிலாந்தில் 175,025 குழந்தைகள் உட்பட 382,618 பேர் வீடற்றவர்களாக அடையாளம் காணப்பட்டுள்ளதாக தெரிவிக்கப்பட்டுள்ளது.  இது கடந்த ஆண்டை விட 20 சதவீதம் அதிகரித்துள்ளதாக சுட்டிக்காட்டப்பட்டுள்ளது.

தற்காலிக தங்குமிடங்களில் மிகப்பெரிய அதிகரிப்பை நாங்கள் காண்கிறோம், மேலும் அவற்றை அணுகும் மக்களின் எண்ணிக்கையும் சாதனை அளவில் உள்ளது. போதுமான சமூக வீட்டுவசதி இல்லை, தனியார் துறை மலிவு விலையில் இல்லை என வீடற்றோர் அறக்கட்டளையின் சமூக மாற்ற இயக்குநர் பிரான்செஸ்கா அல்பானீஸ் ( Francesca  Albanese) கூறியுள்ளார்.