டென்மார்க் இன்றி அமெரிக்காவுடன் நேரடிப் பேச்சுவார்த்தை – கிரீன்லாந்து எதிர்க்கட்சித் தலைவர் வலியுறுத்தல்!
கிரீன்லாந்தைக் கைப்பற்ற அல்லது தனது கட்டுப்பாட்டில் கொண்டு வர அமெரிக்க அதிபர் டொனால்ட் ட்ரம்ப் எடுத்து வரும் தீவிர முயற்சிகளுக்கு எவ்வாறு பதிலளிப்பது என்பது குறித்து அந்த ஆர்க்டிக் தீவு ஆலோசித்து வருகிறது.
இந்நிலையில், டென்மார்க் அரசைத் தவிர்த்துவிட்டு அமெரிக்காவுடன் கிரீன்லாந்து அரசு நேரடிப் பேச்சுவார்த்தை நடத்த வேண்டும் என்று அந்நாட்டின் முக்கிய எதிர்க்கட்சித் தலைவர் தெரிவித்துள்ளார்.
கிரீன்லாந்தின் மிகப்பெரிய எதிர்க்கட்சியான நலேராக் (Naleraq) கட்சியின் தலைவர் பெலே ப்ரோபெர்க் (Pele Broberg), “டென்மார்க் அரசு தனது மத்தியஸ்தம் மூலம் கிரீன்லாந்து மற்றும் அமெரிக்கா ஆகிய இரு தரப்பையும் பகைத்துக் கொள்கிறது.
எனவே, தற்போதைய கிரீன்லாந்து அரசு டென்மார்க் இல்லாமல் நேரடியாக வாஷிங்டனுடன் பேச வேண்டும்” என்று ஒரு செய்தி நிறுவனத்திடம் தெரிவித்துள்ளார்.
ட்ரம்ப் 2019-ல் தான் முன்வைத்த ‘கிரீன்லாந்தை வாங்கும்’ திட்டத்தை, தற்போது மீண்டும் தீவிரப்படுத்தியுள்ளார். இதற்கு அமெரிக்காவிற்குள்ளேயே கடும் எதிர்ப்பு நிலவினாலும், அவர் தொடர்ந்து அழுத்தம் கொடுத்து வருகிறார்.
ஐரோப்பாவிற்கும் வட அமெரிக்காவிற்கும் இடையே அமைந்துள்ள கிரீன்லாந்து, அமெரிக்காவின் ஏவுகணை பாதுகாப்பு அமைப்பிற்கு (Ballistic Missile Defence) மிக முக்கியமான இடமாகும். அடுத்து சீனா மீதான கனிம வளச் சார்பைக் குறைக்க, கிரீன்லாந்தில் உள்ள அபரிமிதமான இயற்கை வளங்கள் அமெரிக்காவிற்கு உதவும்.
கிரீன்லாந்து டென்மார்க் ராச்சியத்தின் கீழ் ஒரு தன்னாட்சிப் பகுதியாக உள்ளது. இதற்குச் சொந்தமாக நாடாளுமன்றமும் அரசாங்கமும் இருந்தாலும், வெளியுறவு மற்றும் பாதுகாப்பு விவகாரங்களை டென்மார்க் (Copenhagen) மட்டுமே கவனித்து வருகிறது.
நலேராக் கட்சியானது கிரீன்லாந்தின் முழுமையான சுதந்திரத்திற்காகப் போராடி வருகிறது. கடந்த தேர்தலில் 25% வாக்குகளைப் பெற்று தனது பலத்தை இரட்டிப்பாக்கியுள்ளது.
கிரீன்லாந்து அமெரிக்காவின் ஒரு பகுதியாக மாறாமல், அதே சமயம் அமெரிக்காவின் ராணுவப் பாதுகாப்பைப் பெற்றுக்கொண்டு அதற்குப் பதிலாக அமெரிக்காவிற்கு ராணுவ உரிமைகளை வழங்கும் ஒரு ஒப்பந்தத்தை (Free Association) ப்ரோபெர்க் முன்மொழிந்துள்ளார்.
இதற்கு பதிலளித்த கிரீன்லாந்து வெளியுறவுத் துறை அமைச்சர் விவியன் மோட்ஸ்ஃபெல்ட், (Vivian Motzfeldt) டென்மார்க் இல்லாமல் அமெரிக்காவுடன் நேரடிப் பேச்சுவார்த்தை நடத்துவது சட்டப்படி சாத்தியமில்லை என்று கூறியுள்ளார். “நாங்கள் சட்டத்தை மதிக்க வேண்டும், ராச்சியத்திற்குள் சிக்கல்களைத் தீர்க்க எங்களுக்கு விதிகள் உள்ளன” என்று அவர் தெரிவித்துள்ளார்.
