பரீட்சைக்காக தாயின் மரணத்தை மகனிடம் மறைந்த தந்தை

கல்வி பொது தராதர சாதாரண தர பரீட்சை நிறைவடையும் வரை, தனது தாயின் மரணத்தை மகனுக்கு கூறாமல் மறைத்த தந்தை ஒருவர் தொடர்பான செய்தி காலி பிரதேசத்தில் பதிவாகியுள்ளது.

இந்த பெண் கடந்த 12ம் திகதி தனது குடும்ப உறுப்பினர்களுடன் மதிய உணவை உட்கொண்டு, பின்னர் அனைவரும் ஐஸ் கிரீம் உட்கொண்டுள்ளனர்.

இதன்போது, குறித்த பெண்ணுக்கு திடீர் இருமல் ஏற்பட்ட நிலையில், அவர் சுயநினைவை இழந்து கீழே வீழ்ந்துள்ளார்.

அதனைத் தொடர்ந்து கராபிட்டி வைத்தியசாலையில் அனுமதிக்கப்பட்ட பெண், தீவிர சிகிச்சை பிரிவில் சிகிச்சை பெற்று வந்த நிலையில் உயிரிழந்துள்ளார்.

சாதாரண தர பரீட்சை நிறைவடைவதற்கு நான்கு நாட்கள் எஞ்சியிருந்த சந்தர்ப்பத்திலேயே அவர் உயிரிழந்துள்ளார்.

தனது தாயின் இழப்பை ஏற்றுக்கொள்ள முடியாமல் போனால், பரீட்சையை சிறந்த முறையில் தனது மகன் எதிர்கொள்ள மாட்டார் என்ற அச்சத்தினால், தாயின் உயிரிழப்பை தந்தை தனது மகனிடம் மறைத்துள்ளார்.

பரீட்சை நேற்றைய தினம் (15) முடிவடைந்த நிலையில், சடலம் வீட்டிற்கு இன்று (16) கொண்டு வரப்பட்டு மக்கள் அஞ்சலிக்காக வைக்கப்பட்டுள்ளது.