இலங்கையில் 20 சதவீதம் வரை குறைக்கப்படவுள்ள மின்சார கட்டணம்?

மின்சாரக் கட்டணத்தை 10 முதல் 20 சதவீதம் வரை குறைப்பதற்கான சாத்தியக்கூறுகள் காணப்படுவதாகவும், மின்சார சபையை மறுசீரமைத்தால் மின்சாரக் கட்டணம் அதிகரிக்கும் எனவும் இலங்கை மின்சார சபை பொறியியலாளர் சங்கத்தின் தலைவர் தனுஷ்க பராக்கிரமசிங்க தெரிவித்துள்ளார்.

கொழும்பில் விசேட ஊடகவியலாளர் சந்திப்பொன்றை நடத்தும் போதே தனுஷ்க பராக்கிரமசிங்க இதனை அறிவித்தார்.

இந்த வருடத்தின் இரண்டாவது மின் கட்டண திருத்தத்தை ஜூலை 1 ஆம் திகதி நடைமுறைப்படுத்துவதற்கான முன்மொழிவு இந்த வாரத்தில் மின்சார சபை மற்றும் பொதுப் பயன்பாடுகள் ஆணைக்குழுவிடம் சமர்ப்பிக்கப்படவுள்ளதாகவும் அங்கு மக்கள் மின்சாரக் கட்டணத்தை கணிசமான அளவில் குறைக்க வேண்டும் எனவும் அவர் குறிப்பிட்டுள்ளார்.

பாராளுமன்றத்தில் விவாதிக்கப்படவுள்ள மின்சார சபை மறுசீரமைப்புச் சட்டத்தின் மூலம் மின்சாரக் கட்டணத்தை உயர்த்துவதற்குத் தேவையான ஏற்பாடுகள் கிடைத்துள்ளதாகத் தெரிவித்த பராக்கிரமசிங்க, வெளிநாட்டு நிறுவனங்களின் தேவைக்கேற்ப மின்சார சபையின் தற்போதைய நிர்வாகம் ஏற்கனவே செயற்பட்டு வருவதாகத் தெரிவித்தார்.