எல்லை அருகே பாகிஸ்தான் படைகளுடனான மோதலில் எட்டு தலிபான்கள் உயிரிழப்பு
பாகிஸ்தான்-ஆப்கானிஸ்தான் எல்லையில் பாகிஸ்தான் ராணுவம் மற்றும் தலீபான்களிடையே மோதல் வெடித்துள்ளது. ஆப்கானிஸ்தானில் பதுங்கி இருக்கும் தெஹ்ரிக்-இ-தலீபான் என்ற அமைப்பை சேர்ந்தவர்கள் பாகிஸ்தானில் பயங்கரவாத தாக்குதல்களை நிகழ்த்தி வருவதாக பாகிஸ்தான் அரசு குற்றம் சாட்டி வருகிறது.
சமீபத்தில் ஆப்கானிஸ்தானில் உள்ள தெஹ்ரிக்-இ-தலீபான் அமைப்பினரின் முகாம்களை குறிவைத்து பாகிஸ்தான் ராணுவம் வான்வழி தாக்குதல் நடத்தியது. இந்த தாக்குதலில் 4 முகாம்கள் அழிக்கப்பட்டதாகவும், ஏராளமான பயங்கரவாதிகள் கொல்லப்பட்டதாகவும் பாகிஸ்தான் ராணுவம் தெரிவித்தது.
ஆனால், பாகிஸ்தான் ராணுவத்தின் தாக்குதலில் வாரிஸ்தான் அகதிகள் பலர் கொல்லப்பட்டதாக ஆப்கானிஸ்தானில் ஆட்சி செய்து வரும் தலீபான் அரசாங்கத்தின் பாதுகாப்புத்துறை அமைச்சகம் தெரிவித்தது. இதனை தொடர்ந்து ஆப்கானிஸ்தான்-பாகிஸ்தான் எல்லை அருகே உள்ள கோஸ்காரி, மதா சங்கர், கோட் ரகா மற்றும் டாரி மெங்கல் உள்ளிட்ட இடங்களில் ராணுவ சோதனை சாவடிகளை குறிவைத்து தலீபான்கள் தாக்குதல் நடத்தினர்.
இதற்கு பாகிஸ்தான் ராணுவத்தினர் பதிலடி கொடுத்தனர். இந்த மோதலில் 8 தலீபான்கள் பலியானதாகவும், பாகிஸ்தான் வீரர் ஒருவர் உயிரிழந்ததாகவும் பாகிஸ்தான் ராணுவம் தெரிவித்தது. அதே சமயம், தலீபான்கள் தரப்பில் 19 பாகிஸ்தான் வீரர்களை சுட்டுக் கொன்றதாக தகவல் தெரிவிக்கப்பட்டுள்ளது குறிப்பிடத்தக்கது.
(Visited 40 times, 1 visits today)
