ஈஸ்டர் தாக்குதல் : சர்வதேச விசாரணைக்கு செல்ல மாட்டோம் – ரணில்!

2019 ஈஸ்டர் ஞாயிறு குண்டுவெடிப்பு தொடர்பாக பிரித்தானிய தொலைக்காட்சி வலையமைப்பான சனல் 4 ஒளிபரப்பிய ஆவணப்படத்தில் சுமத்தப்பட்டுள்ள குற்றச்சாட்டுகளை ஜனாதிபதி ரணில் விக்கிரமசிங்க கடுமையாக சாடியுள்ளார்.

ஜேர்மனியை தளமாகக் கொண்ட சர்வதேச ஊடகம் ஒன்றுக்கு அவர் வழங்கிய நேர்காணலில் மேற்படி ஆட்சேபணை  தெரிவித்துள்ளார்.

இதன்போது மேலும் தெரிவித்த அவர், ஈஸ்டர் ஞாயிறு பயங்கரவாதத் தாக்குதல்கள் உட்பட எந்தவொரு பிரச்சினையிலும் இலங்கை அரசாங்கம் சர்வதேச விசாரணையை மேற்கொள்ளாது எனக் குறிப்பிட்டுள்ளார்.

இந்தக் குற்றச்சாட்டுகள் தொடர்பில் ஆராய நீதிபதி, முன்னாள் விமானப்படைத் தளபதி மற்றும் பிரபல சட்டத்தரணி ஆகியோர் அடங்கிய குழுவொன்றை நியமித்துள்ளதாகவும் அவர் கூறியுள்ளார்.

மேலும் ஜனாதிபதி ரணில் விக்கிரமசிங்க ஈஸ்டர் தாக்குதல் தொடர்பான பல கேள்விகளுக்கு தனது நிதானத்தை இழந்ததாக சிங்கள ஊடகம் ஒன்று குறிப்பிட்டுள்ளது.