பிரித்தானியாவில் மாணவிக்கு கத்திக்குத்து: மூடப்பட்ட பாடசாலை
நார்விச் அருகிலுள்ள தோர்ப் செயின்ட் ஆண்ட்ரூ (Thorpe St Andrew) உயர்நிலைப் பள்ளியில் இன்று காலை ஒரு மாணவி கத்தியால் குத்தப்பட்ட அதிர்ச்சி சம்பவம் நிகழ்ந்துள்ளது. இச்சம்பவத்தைத் தொடர்ந்து அந்தப் பள்ளி முழுவதும் உடனடியாக மூடப்பட்டுள்ளது.
இன்று காலை சுமார் 10:24 மணி (GMT) அளவில், பள்ளியில் ஒரு மாணவி கத்தியால் குத்தப்பட்டதாகக் காவல்துறைக்குத் தகவல் கொடுக்கப்பட்டுள்ளது.
அதனை தொடர்ந்து அங்கு வந்த காவல்துறையினரும் அவசரக்கால ஊர்திகள் சேவைகளும் விரைந்து செயல்பட்டு காயமடைந்த மாணவியை உடனடியாக மருத்துவமனைக்குக் கொண்டு சென்றனர்.
மேலும் அவருக்கு ஏற்பட்ட காயங்கள் உயிருக்கு ஆபத்தானவை அல்ல (Minor injuries) என்று காவல்துறையினர் உறுதிப்படுத்தியுள்ளனர்.
நார்ஃபோல்க் (Norfolk) காவல்துறையினர் மற்றும் ஆயுதம் ஏந்திய அதிரடிப்படையினர் சம்பவ இடத்திற்கு விரைந்துள்ளனர். தப்பியோடிய சந்தேக நபரைக் கண்டுபிடிக்கப் பள்ளி மற்றும் அதனைச் சுற்றியுள்ள பகுதிகளில் தீவிரத் தேடுதல் வேட்டை நடைபெற்று வருகிறது.
மேலும் பாதுகாப்பு கருதி மாணவர்கள் அனைவரும் பள்ளி கட்டிடங்களுக்குள்ளேயே இருக்க அறிவுறுத்தப்பட்டுள்ளனர்.
பள்ளியின் பிரதான நுழைவாயில் அமைந்துள்ள லான்ட்ரி லேன் (Laundry Lane) சாலை இருபுறமும் மூடப்பட்டுள்ளது. அவசரக்கால ஊர்திகள் மற்றும் காவல்துறை வாகனங்கள் தவிர மற்ற வாகனங்கள் நுழைய தடை விதிக்கப்பட்டுள்ளது.
பள்ளியை நிர்வகிக்கும் ‘பிராட் ஹொரைசன்ஸ் எஜுகேஷன் டிரஸ்ட்’ (Broad Horizons Education Trust), இந்தச் சூழலை உன்னிப்பாகக் கவனித்து வருவதாகத் தெரிவித்துள்ளது. “தற்போது விசாரணை நடைபெற்று வருவதால் கூடுதல் தகவல்களைப் பகிர முடியாது, ஆனால் மாணவர்களின் பாதுகாப்பே எங்களது முதல் முன்னுரிமை” என்று அவர்கள் பிபிசி-யிடம் தெரிவித்துள்ளனர்.
சமூக வலைதளங்களில் தங்களது கவலையைப் பகிர்ந்து வரும் பெற்றோர்கள், பள்ளி நிர்வாகத்திடம் இருந்து தெளிவான தகவல் கிடைக்காததால் பிள்ளைகளின் பாதுகாப்பு குறித்து மிகுந்த அச்சத்தில் உள்ளனர். “நாங்கள் பள்ளியின் வாசலில் காத்திருக்கிறோம், ஆனால் எங்களை உள்ளே விடவில்லை” என்று கவலையுடன் பதிவிட்டு வருகின்றனர்.
காவல்துறை இந்தச் சம்பவத்தை ஒரு “தீவிரமான குற்றச் சம்பவம்” (Crime Incident) என்று மட்டுமே தற்போது வரை குறிப்பிட்டுள்ளது. இது ஏதேனும் மிரட்டல் காரணமா அல்லது உள்ளூர் நபரின் அச்சுறுத்தலா என்பது குறித்து இன்னும் அதிகாரப்பூர்வத் தகவல்கள் வெளியாகவில்லை.
