நெற்செய்கைக்கு இணையான விலையில் கிடைக்கும் உரத்தை மரக்கறி செய்வோருக்கும் வழங்க நடவடிக்கை!

நெற்செய்கைக்கு யூரியா உரத்திற்கு இணையான விலையில் கிடைக்கும் யூரியா உரத்தை   மரக்கறி விவசாயிகளுக்கு வழங்க தீர்மானிக்கப்பட்டுள்ளதாக விவசாய அமைச்சர் மஹிந்த அமரவீர தெரிவித்துள்ளார்.

பொருளாதார நிலையங்களின் முகாமையாளர்கள் மற்றும் விவசாயிகள் பிரதிநிதிகளுடன் இடம்பெற்ற கலந்துரையாடலின் போதே அமைச்சர் இதனைத் தெரிவித்துள்ளதாக விவசாய அமைச்சு தெரிவித்துள்ளது.

அங்கு கருத்து தெரிவித்த விவசாய பிரதிநிதிகள், தொடரும் வறட்சி மற்றும் உர விலை உயர்வால் மரக்கறி விவசாயிகள் சிரமங்களை எதிர்நோக்கி வருவதாக தெரிவித்துள்ளனர்.

இதன் காரணமாக நெல் பயிர்ச்செய்கைக்கு யூரியா உரம் மானிய விலையில் வழங்குவதற்கு நடவடிக்கை எடுப்பதுடன் மரக்கறி பயிரிடுவதற்கும் நடவடிக்கை எடுக்குமாறு அமைச்சரிடம் கோரிக்கை விடுத்துள்ளனர்.

அதற்குப் பதிலளித்த அமைச்சர் மஹிந்த அமரவீர, அடுத்த பருவத்தில் இருந்து நெற்செய்கைக்கான யூரியா உரத்துக்கு நிகரான விலையில் மரக்கறி விவசாயிகளுக்கும் யூரியா உரம் வழங்க நடவடிக்கை எடுக்கப்படும் எனத்  தெரிவித்துள்ளார்.

மேலும், இலங்கை உரக் கூட்டுத்தாபனம் மற்றும் வர்த்தக உர நிறுவனம் ஆகியன மரக்கறிகள் மற்றும் ஏனைய பயிர்களுக்கு கலப்பு உரங்களை தயாரித்து சந்தை விலையை விட குறைந்த விலையில் இந்த உரங்களை வழங்குவதற்கு ஏற்பாடு செய்துள்ளதாக அமைச்சர் மேலும் குறிப்பிட்டார்.