உலகின் மிகவும் ஆபத்தான மனிதர்களில் ஒருவர் ஈராக்கில் கைது

உலகின் மிகவும் ஆபத்தான தேடப்படும் மனிதர்களில் ஒருவர் என்று விவரிக்கப்படும் ஆஸ்திரேலியாவின்(Australia) பாதாள உலகக் குழுவைச் சேர்ந்த காசெம் ஹமாத்தை(Qassem Hamad) ஈராக்கிய அதிகாரிகள் கைது செய்துள்ளனர்.

காதிம் மாலிக் ஹமாத் ரபா அல்-ஹஜாமி(Khadim Malik Hamad Rabah al-Hazami) என்றும் அழைக்கப்படும் ஹமாத், ஈராக்கின் சர்வதேச நீதித்துறை ஒத்துழைப்புக்கான தேசிய மையத்தால் கைது செய்யப்பட்டதாக அதிகாரிகள் தெரிவித்துள்ளனர்.

2023ம் ஆண்டு ஆஸ்திரேலியாவிலிருந்து ஈராக்கிற்கு(Iraq) நாடு கடத்தப்பட்ட பின்னர், மெல்போர்னின்(Melbourne) சட்டவிரோத புகையிலை வர்த்தகம் மற்றும் ஒழுங்கமைக்கப்பட்ட குற்ற வலையமைப்புகளில் ஹமாத் குறிப்பிடத்தக்க பங்கைக் கொண்டிருந்ததாக சந்தேகிக்கப்படுகிறது.

ஈராக் அதிகாரிகளின் கூற்றுப்படி, அவர் ஈராக் மற்றும் ஆஸ்திரேலியா இரண்டிற்கும் அதிக அளவில் போதைப்பொருட்களை இறக்குமதி செய்தல், ஹெராயின்(heroin) கடத்தல் மற்றும் சிட்னியில்(Sydney) உள்ள முக்கிய ஒழுங்கமைக்கப்பட்ட குற்றக் கும்பல்களுடன் இணைந்து பணியாற்றுவதில் ஈடுபட்டதாக நம்பப்படுகிறது.

இந்த குழுக்கள் உலகளவில் துப்பாக்கிச் சூடு, கொலைகள், கடத்தல்கள், பணம் பறித்தல், வன்முறைத் தாக்குதல்கள், பணமோசடி, மோசடி, தீ வைப்பு மற்றும் போதைப்பொருள் கடத்தல் ஆகியவற்றுடன் தொடர்புடையதாகக் கூறப்படுகிறது.

ஈராக்கிற்கு நாடு கடத்தப்படுவதற்கு முன்பு, போதைப்பொருள் கடத்தல் கும்பலில் ஈடுபட்டதற்காக ஹமாத் ஆஸ்திரேலியாவில் எட்டு ஆண்டுகள் சிறைத்தண்டனை அனுபவித்திருந்தார்.