மரபணு சோதனை விதி: அமெரிக்க விசாவுக்கு பசில் எதிர்ப்பு.

அமெரிக்காவிற்குச் சுற்றுலா வரும் வெளிநாட்டுப் பயணிகளிடம் அவர்களின் மரபணு (DNA) மாதிரிகளைக் கோருவதற்கு அமெரிக்க அதிகாரிகள் திட்டமிட்டுள்ளதாக வெளியாகியுள்ள தகவல் பெரும் சர்ச்சையை ஏற்படுத்தியுள்ளது.

ஆஸ்திரேலியா, பிரித்தானியா மற்றும் பிரான்ஸ் உட்பட, விசா விலக்கு அளிக்கப்பட்ட 42 நாடுகளைச் சேர்ந்த பயணிகள் அமெரிக்காவிற்குள் நுழையப் பயன்படுத்தும் ESTA திட்டத்தின் கீழ் இந்த புதிய விதிகள் முன்மொழியப்பட்டுள்ளன. அமெரிக்க சுங்க மற்றும் எல்லைப் பாதுகாப்பு முகமையின் முன்மொழிவு ஆவணம் ஒன்றில், பயணிகளிடமிருந்து மரபணு (DNA) உட்பட ‘அதிக மதிப்புள்ள தரவுகளை’ கோர முடியும் என்று சுட்டிக்காட்டப்பட்டுள்ளது. இந்த முன்மொழிவை விமர்சித்த மேற்கு ஆஸ்திரேலிய எதிர்க்கட்சித் தலைவர் பசில் செம்பிலாஸ், மரபணு (DNA) கேட்பது “மிகவும் எல்லை மீறிய செயல்” என்றும், இத்தகைய விதிமுறைகள் நடைமுறைப்படுத்தப்பட்டால் சுற்றுலாப் பயணிகள் அமெரிக்காவுக்குச் செல்வது குறித்து மறுபரிசீலனை செய்வார்கள் என்றும் எச்சரித்துள்ளார். அத்துடன், அமெரிக்காவுக்குள் நுழையப் பயணிகள் கடந்த ஐந்து ஆண்டுகள் வரையிலான சமூக ஊடக வரலாற்றைத் தெரிவிக்க வேண்டும் என்றும் ட்ரம்ப் நிர்வாகம் முன்மொழிந்துள்ளது.

ஆஸ்திரேலிய செனட்டர் மாட் கனவான், இந்த மரபணு (DNA) தேவை கவலை அளித்தாலும், ஒரு இறையாண்மை கொண்ட நாடு என்ற வகையில் எல்லைகளைப் பாதுகாப்பது குறித்த முடிவுகளை எடுக்கும் உரிமை அமெரிக்காவுக்கு உள்ளது என்றும் தெரிவித்துள்ளார்.