இலங்கை பாடசாலைகளில் 36 ஆயிரத்திற்கும் மேற்பட்ட ஆசிரியர் வெற்றிடங்கள் – பிரதமர் தகவல்!

இலங்கை முழுவதும் ஏறக்குறைய 36,178 ஆசிரியர்களுக்கான பணியிடங்கள் நிரப்பப்படாமல் இருப்பதாக கல்வி, உயர்கல்வி மற்றும் தொழிற்கல்வி அமைச்சரும் பிரதமருமான டாக்டர் ஹரிணி அமரசூரிய இன்று (21) நாடாளுமன்றத்தில் தெரிவித்தார்.

நாடாளுமன்றத்தில் எழுப்பப்பட்ட கேள்விக்கு பதிலளித்த பிரதமர், தேசிய பாடசாலைகளில் 1,501 ஆசிரியர் காலியிடங்கள் இருப்பதாகக் கூறினார்.

இதற்கமைய மேற்கு மாகாணத்தில் 4,630, தெற்கு மாகாணத்தில் 2,513, மத்திய மாகாணத்தில் 6,318, வடமேற்கு மாகாணத்தில் 2,990, ஊவா மாகாணத்தில் 2,780, வடமத்திய மாகாணத்தில் 1,568, கிழக்கு மாகாணத்தில் 6,613, சபரகமுவ மாகாணத்தில் 3,994 மற்றும் வடக்கு மாகாணத்தில் 3,271 ஆசிரியர் பணியிடங்கள் நிரப்பப்படாமல் இருப்பதாக அவர் சுட்டிக்காட்டியுள்ளார்.

நாடு முழுவதும் உள்ள தேசியப் பாடசாலைகளில் அறிவியல், கணிதம், தொழில்நுட்பம் மற்றும் மொழிகள் ஆகிய துறைகளில் வெற்றிடங்கள் இருப்பதாகவும் பிரதமர் சுட்டிக்காட்டினார்.

இதேவேளை இலங்கை கற்பித்தல் சேவையின் தரம் III (B) 1 ஐச் சேர்ந்த 353 பட்டதாரி ஆசிரியர்கள் அடுத்த இரண்டு மாதங்களுக்குள் ஆட்சேர்ப்பு செய்யப்பட உள்ளதாகவும் அவர் தகவல் தெரிவித்தார்.

மேலும், கற்பித்தல் சேவையில் மீதமுள்ள காலியிடங்களை விரைவாக நிரப்ப தேவையான நடவடிக்கைகளை எடுக்க பிரதமரின் செயலாளரின் தலைமையில் நிறுவப்பட்ட ஆட்சேர்ப்பு மறுஆய்வுக் குழுவிடம் கோரிக்கைகள் சமர்ப்பிக்கப்படும் என்றும் பிரதமர் குறிப்பிட்டுள்ளார்.