இலங்கை வரவு செலவுத் திட்டம் தொடர்பாக ஜனாதிபதியை சாடியுள்ள சஜித்

இன்றைய வரவு செலவுத் திட்ட உரையை ஜனாதிபதித் தேர்தல் மேடையில் முன்வைக்கப்பட்ட கொள்கைகளுடன் ஒப்பிட்டுப் பார்க்க வேண்டும் என எதிர்க்கட்சித் தலைவர் சஜித் பிரேமதாச தெரிவித்துள்ளார்.

2025ஆம் ஆண்டுக்கான வரவு செலவுத் திட்டத்தில் எத்தனை வாக்குறுதிகள் நிறைவேற்றப்பட்டுள்ளன என்பதை ஆராய வேண்டியதன் அவசியத்தை பாராளுமன்ற உறுப்பினர் சஜித் பிரேமதாச வலியுறுத்தினார்.

“Rata Anurata” கருத்தின் கீழ் முன்வைக்கப்பட்ட கொள்கைகள் நிலையான பொருளாதாரத்தை உருவாக்க உறுதியளிக்கும் அதே வேளையில், நாடு சர்வதேச நாணய நிதியத்திடம் (IMF) ஒப்படைக்கப்பட்டுள்ளதாகவும், IMF நிர்ணயித்த கட்டுப்பாடுகளுக்குள் வரவு செலவுத் திட்ட நடவடிக்கைகள் மேற்கொள்ளப்பட்டுள்ளதாகவும் அவர் சுட்டிக்காட்டினார்.

2025 ஆம் ஆண்டிற்கான அரசாங்கத்தின் வரவு செலவுத் திட்டம் குறித்து இன்று ஊடகங்களுக்கு கருத்து தெரிவித்த பாராளுமன்ற உறுப்பினர் சஜித் பிரேமதாச, வரவு செலவுத் திட்டத்தின் படி, 2.5% முதன்மை உபரியாக பேணப்பட வேண்டும் மற்றும் மொத்த உள்நாட்டு உற்பத்தியில் (GDP) முதன்மை செலவினம் 13% வரை மட்டுப்படுத்தப்பட வேண்டும் என்றார்.

2024 ஆம் ஆண்டு பொது நிதி மேலாண்மைச் சட்டத்தில் அறிமுகப்படுத்தப்பட்ட 13% வரம்பு IMF கொள்கைகளுடன் ஒத்துப்போகிறது என்றும் 2.5% முதன்மை உபரியை பராமரிப்பது நேரடி IMF பரிந்துரை என்றும் அவர் வலியுறுத்தினார்.

முதலீட்டிற்காக மிகக் குறைந்த அளவிலான வளங்களே ஒதுக்கப்பட்டுள்ளதாக எதிர்க்கட்சித் தலைவர் சுட்டிக்காட்டினார்.

தீர்வுகள் இல்லாத பட்ஜெட்

கடனில் சிக்கியுள்ள சிறிய மற்றும் நடுத்தர தொழில் முயற்சியாளர்களுக்கான தீர்வுகளை வழங்குவதில் தோல்வியடைந்துள்ளதாகவும், வறுமையில் இருந்து மீள்வதற்கு வழி வழங்கவில்லை எனவும் பாராளுமன்ற உறுப்பினர் பிரேமதாச வரவு செலவுத் திட்டத்தை விமர்சித்தார்.

தொழில்முனைவோர் மூலம் உயர் பொருளாதார வளர்ச்சிக்கு வரவு செலவுத் திட்டம் துணைபுரியவில்லை என்றும், பெருந்தோட்டம், விவசாயம் மற்றும் மீன்பிடித் துறைகள் தொடர்பான உறுதிமொழிகள் நிறைவேற்றப்படவில்லை என்றும் அவர் வாதிட்டார்.

ஜனாதிபதி சர்வதேச நாணய நிதியத்தின் பணியாளராக மாறுகிறார்

புதிய கடன் மறுசீரமைப்பு ஒப்பந்தம் தொடரப்படும் என தேர்தல் மேடையில் கூறப்பட்ட நிலையில், ஜனாதிபதி அனுரகுமார திஸாநாயக்க தற்போது சர்வதேச நாணய நிதியத்தின் பாதையை நேரடியாகப் பின்பற்றி வருவதாக பாராளுமன்ற உறுப்பினர் பிரேமதாச தெரிவித்துள்ளார்.

சர்வதேச நாணய நிதியத்தின் கட்டமைப்பிற்குள் பணியாற்றுவது அவசியமான போதிலும், தான் ஆட்சியில் இருந்திருந்தால் மக்களை மையமாகக் கொண்ட அணுகுமுறையைக் கடைப்பிடித்திருப்பேன், மேலும் வரவு செலவுத் திட்டத்தில் திருத்தங்களை மேற்கொள்ள வலியுறுத்தினார்.

ஆறுமாதத்தில் சம்பள உயர்வு, வெறும் கனவு

வரவு செலவுத் திட்ட உரைக்கும் ஆரம்பக் கொள்கைப் பிரேரணைகளுக்கும் இடையில் ஒப்பிட்டுப் பார்க்குமாறும் தற்போதைய ஜனாதிபதி பொது ஆணையை கைவிட்டு சர்வதேச நாணய நிதியத்தின் பிணைக்கைதியாக மாறியுள்ளதாகவும் பாராளுமன்ற உறுப்பினர் சஜித் பிரேமதாச குறிப்பிட்டுள்ளார்.

பொதுத்துறை ஊழியர்களுக்கு ஆறு மாதங்களுக்கு ஒருமுறை சம்பள உயர்வு என்று கூறப்பட்டாலும், உண்மையில், இந்த உயர்வு மூன்று ஆண்டுகளுக்குள் மட்டுமே நடைமுறைப்படுத்தப்படும் என்றும், அதன் பின்னரும் கூட, அந்தத் தொகைகள் அற்பமானதாக இருக்கும் என்றும் அவர் குறிப்பிட்டார்.

தனியார் துறையை அரசாங்கம் புறக்கணிப்பதாக எதிர்க்கட்சித் தலைவர் மேலும் விமர்சித்தார்.