பிரதமரிடமிருந்து கல்வி அமைச்சு பறிப்பு?

பிரதமரிடமிருந்து கல்வி அமைச்சு பறிக்கப்படமாட்டாது என்று வெளிவிவகார அமைச்சர் விஜித ஹேரத் Vijitha Herath திட்டவட்டமாக அறிவித்தார்.

தேசிய மக்கள் சக்தி NPP அரசாங்கத்தில் பிரதமராக செயல்படும் கலாநிதி ஹரிணி அமரசூரிய Dr. Harini Amarasooriya வசமே கல்வி அமைச்சும் இருக்கின்றது.

இந்நிலையில் தரம் 6 ஆங்கில பாட புத்தகத்தில் ஏற்பட்டுள்ள பிரச்சினையால் கல்வி அமைச்சருக்கு எதிராக எதிர்ப்பு வலுத்துள்ளது.

பிரதமருக்கு எதிராக நம்பிக்கையில்லாப் பிரேரணையும் முன்வைக்கப்படவுள்ளது.

எனவே, பிரதமர் வசம் இருக்கும் கல்வி அமைச்சு பதவியில் மாற்றம் வருமா என வெளிவிவகார அமைச்சரிடம் வினவப்பட்டது.

இதற்கு பதிலளித்த அவர் கூறியவை வருமாறு,

“ பிரதமரை நாம்தான் நியமித்தோம். அவர் அப்பதவியில் நீடிப்பார். அதில் எவ்வித மாற்றமும் வராது. கல்வி அமைச்சும் அவர் வசமே இருக்கும்.

கல்வி மறுசீரமைப்பென்பது பாரிய பணியாகும். இதில் ஒரு இடத்தில் இடம்பெற்ற வலுவை அடிப்படையாகக்கொண்டு பிரதமரை இலக்கு வைப்பது ஏற்புடையது அல்ல.” – என்றார்.