ப்ரீமியம் குடும்ப கணக்கு வைத்திருப்பவர்களுக்கு எச்சரிக்கை விடுத்த யூடியூப்!
யூடியூப் பிரீமியம் குடும்ப கணக்கு வைத்திருப்பவர்களுக்கு யூடியூப் நிறுவனம் புதிய எச்சரிக்கை ஒன்றை விடுத்துள்ளது. இந்த கணக்கு மூலம், விளம்பரங்கள் இல்லாமல் வீடியோக்களை பார்க்கலாம், உயர் தரத்தில் வீடியோக்களை ஆஃப்லைனில் பதிவிறக்கலாம், மற்றும் பின்னணியில் (Background) வீடியோக்களை இயக்கலாம் போன்ற சிறப்பு வசதிகளை ஆறு பேர் வரை (குடும்ப மேலாளர் உட்பட) பகிர்ந்து பயன்படுத்தலாம். ஆனால், இந்த கணக்கில் உள்ள அனைவரும் ஒரே வீட்டில் (அதாவது ஒரே முகவரியில்) வசிக்க வேண்டும் என்று யூடியூப் விதிமுறை கூறுகிறது.
இந்த விதியை மீறுவோர் கண்டறியப்பட்டால், அவர்களின் பிரீமியம் சேவை 14 நாட்களுக்கு நிறுத்தப்படும் என்று யூடியூப் எச்சரித்துள்ளது. யூடியூப், இந்த குடும்ப கணக்கில் உள்ளவர்களின் இருப்பிடத்தை (Location) ஒவ்வொரு 30 நாட்களுக்கு ஒருமுறை தானாகவே சரிபார்க்கும் என்று தெரிவித்துள்ளது. இதற்காக, IP முகவரிகள், சாதன அடையாளங்கள் (Device IDs), மற்றும் கணக்கு செயல்பாடுகள் போன்றவற்றை பயன்படுத்தி, அனைவரும் ஒரே முகவரியில் வசிக்கிறார்களா என்பதை உறுதி செய்யும்.
இந்த சரிபார்ப்பில், ஒரே வீட்டில் இல்லாத உறுப்பினர்கள் கண்டறியப்பட்டால், அவர்களின் பிரீமியம் சேவைகள் (விளம்பரமில்லா பார்வை, ஆஃப்லைன் பதிவிறக்கம், YouTube Music Premium போன்றவை) நிறுத்தப்படும். இதன்பின், அவர்கள் விளம்பரங்களுடன் இலவச யூடியூப்பை மட்டுமே பயன்படுத்த முடியும் அல்லது தனிப்பட்ட பிரீமியம் கணக்கு வாங்க வேண்டும்.இந்த புதிய கட்டுப்பாடு, மற்ற ஸ்ட்ரீமிங் தளமான நெட்ஃபிளிக்ஸ் (Netflix) ஏற்கனவே அமல்படுத்திய பாஸ்வர்ட் (Password) பகிர்தல் தடுப்பு நடவடிக்கையை ஒத்ததாகும். நெட்ஃபிளிக்ஸ், ஒரே வீட்டில் வசிக்காதவர்கள் கணக்கு பகிர்வதை தடுக்க, இருப்பிட சரிபார்ப்பு முறையை பயன்படுத்தியது.
இதேபோல், யூடியூப்பும் தற்போது கடுமையான கண்காணிப்பை அமல்படுத்தி வருகிறது. இந்தியாவில், யூடியூப் பிரீமியம் குடும்ப கணக்கு மாதத்திற்கு ₹299 விலையில் கிடைக்கிறது, ஆனால் ஒரே முகவரியில் வசிக்காதவர்கள் இதை பகிர்ந்து பயன்படுத்த முடியாது என்று இந்த புதிய விதி தெளிவுபடுத்துகிறது.இந்த மாற்றம், பயணம் செய்பவர்கள், வெவ்வேறு இடங்களில் வசிக்கும் குடும்ப உறுப்பினர்கள், அல்லது கல்லூரியில் படிக்கும் மாணவர்கள் போன்றவர்களுக்கு சிரமத்தை ஏற்படுத்தலாம் என்று பயனர்கள் கவலை தெரிவித்துள்ளனர்.
(Visited 1 times, 1 visits today)
