காபூலில் ஆயிரக்கணக்கானோர் ஆப்கானிஸ்தானின் தேசிய புஸ்காஷி சாம்பியன்ஷிப்பில் பங்கேற்பு

ஆப்கானிஸ்தானின் பாரம்பரிய குதிரையேற்ற விளையாட்டான புஸ்காஷியின் (buzkashi)வருடாந்திர தேசிய சாம்பியன்ஷிப் போட்டி காபூலின் புறநகர்ப் பகுதியில் நடைபெற்றது.

இந்த போட்டியை காண நாட்டின் பல பகுதிகளிலிருந்து குதிரை வீரர்களும் ஆயிரக்கணக்கான பார்வையாளர்களும் திரண்டனர். உயர்மட்ட தலிபான் அதிகாரிகளும் நிகழ்ச்சியில் கலந்து கொண்டதாக சர்வதேச செய்திகள் தெரிவிக்கின்றன.

புஸ்காஷி என்பது ஆப்கானிஸ்தானின் தேசிய விளையாட்டு. இதில் குதிரை வீரர்கள் தோல் போர்த்தப்பட்ட நிறையுடைய மூட்டையை எடுத்துச் சென்று கோல் கோட்டைக் கடக்க வேண்டும்.

போட்டி முழுவதும் கடும் உடல் மோதல்களும் அதிவேக குதிரை ஓட்டமும் காணப்பட்டது.

இறுதியில் வடக்கு சார்-இ-புல் மாகாணம், படாக்ஷான் மாகாணத்தை 7-0 என்ற கணக்கில் தோற்கடித்து சாம்பியன் பட்டத்தை வென்றது. பாக்லான் மூன்றாவது இடத்தையும், குண்டுஸ் நான்காவது இடத்தையும் பிடித்தன.

11 நாட்கள் நடைபெற்ற இந்த தேசிய போட்டியில் ஆப்கானிஸ்தானின் 11 மாகாண அணிகள் பங்கேற்றன. மேலும் தஜிகிஸ்தான் மற்றும் கிர்கிஸ்தான் ஆகிய நாடுகளிலிருந்து எட்டு சர்வதேச வீரர்களும் கலந்து கொண்டனர்.

முதல் நான்கு அணிகளுக்கு கார்கள் பரிசாக வழங்கப்பட்டன. கோப்பைகள், பதக்கங்கள் மற்றும் சான்றிதழ்களும் வழங்கப்பட்டன. போட்டிக்கு ஒரு பெட்ரோல் நிறுவனம் ஆதரவளித்தது.

மத்திய காபூல் மைதானத்தில் ஆயிரக்கணக்கான ஆண் ரசிகர்கள் போட்டியை நேரில் பார்த்தனர். பலர் மரங்களிலும் மின்கம்பங்களிலும் ஏறி ஆட்டத்தை ரசித்தனர்.

1990 களில் தலிபான் ஆட்சிக் காலத்தில் தடை செய்யப்பட்டிருந்த புஸ்காஷி, தற்போது மீண்டும் நடைபெற்று வருகிறது.