இலங்கை பாராளுமன்றத் தேர்தல்: அதிகரிக்கும் முறைப்பாடுகள்!

பாராளுமன்றத் தேர்தல் தொடர்பில் இதுவரை (செப்டெம்பர் மாதம் 26 ஆம் திகதி முதல் ஒக்டோபர் மாதம் 23 ஆம் திகதி வரை) 600 முறைப்பாடுகள் கிடைக்கப் பெற்றுள்ளதாகத் தேர்தல் ஆணைக்குழு தெரிவித்துள்ளது.

அதன்படி, தேர்தல் சட்டங்களை மீறியமை தொடர்பில் தேசிய தேர்தல் முறைப்பாட்டு முகாமைத்துவ நிலையத்திற்கு 196 முறைப்பாடுகளும், மாவட்ட தேர்தல் முறைப்பாட்டு முகாமைத்துவ நிலையத்திற்கு 385 முறைப்பாடுகளும் கிடைக்கப் பெற்றுள்ளன.

இதேவேளை, மாவட்ட தேர்தல் முறைப்பாட்டு முகாமைத்துவ நிலையத்திற்கு வன்முறைச் சம்பவங்கள் தொடர்பில் 4 முறைப்பாடுகளும் ஏனைய விடயங்கள் தொடர்பில் 15 முறைப்பாடுகளும் கிடைக்கப் பெற்றுள்ளன.

கடந்த 24 மணித்தியாலங்களில் தேர்தல் சட்ட மீறல்கள் தொடர்பாக 57 முறைப்பாடுகள் கிடைத்துள்ளதாக தேர்தல்கள் ஆணைக்குழு தெரிவித்துள்ளது.

இதில் 13 புகார்கள் தேசிய தேர்தல் புகார் மேலாண்மை மையத்துக்கும், 45 புகார்கள் மாவட்ட தேர்தல் புகார் மேலாண்மை மையத்துக்கும் அனுப்பப்பட்டுள்ளன.

2024 பொதுத் தேர்தல் தொடர்பான முறைப்பாடுகள் தொடர்பில் 29 பேரை பொலிஸார் கைது செய்துள்ளனர்.

இதேவேளை, எதிர்வரும் நாடாளுமன்றத் தேர்தலுக்காக 5,000 பார்வையாளர்களை களமிறக்கவுள்ளதாக சுதந்திரமான மற்றும் நியாயமான தேர்தலுக்கான மக்கள் நடவடிக்கை (PAFFREL) அமைப்பு அறிவித்துள்ளது.

இந்த கண்காணிப்பாளர்களுக்கான பயிற்சி திட்டங்கள் ஏற்கனவே ஆரம்பிக்கப்பட்டுள்ளதாக PAFFREL இன் நிறைவேற்றுப் பணிப்பாளர் ரோஹன ஹெட்டியாராச்சி தெரிவித்தார்.