2030 ஆம் ஆண்டுக்குள் இலங்கை பொருளாதாரம் 300 பில்லியன் டொலராக வளரக்கூடும்
2030 ஆம் ஆண்டுக்குள் இலங்கை பொருளாதாரம் 300 பில்லியன் டொலராக வளரக்கூடும்
2030 ஆம் ஆண்டுக்குள் இலங்கை பொருளாதாரம் 300 பில்லியன் அமெரிக்க டொலராக வளரக்கூடிய திறன் கொண்டதாக உள்ளது என தொழில்கள் மற்றும் தொழில் முனைவோர் மேம்பாட்டு அமைச்சின் செயலாளர் திலகா ஜயசுந்தரா தெரிவித்தார்.
அண்மையில் ஏற்பட்ட “டிட்வா” சூறாவளி போன்ற இயற்கை அனர்த்தங்கள் இருந்தாலும், நாடு விரைவில் மீண்டு வளர்ச்சி அடையும் என அவர் நம்பிக்கை வெளியிட்டார்.
கொழும்பில் தேசிய உற்பத்தித் திறன் செயலகம் (National Productivity Secretariat) நடத்திய முதல் Certified Productivity Specialist (CPS) சான்றிதழ் வழங்கும் நிகழ்வில் கலந்து கொண்டு அவர் இதனை தெரிவித்தார்.
ஆசிய உற்பத்தித் திறன் அமைப்பு (APO) அங்கீகாரம் பெற்ற சான்றிதழ் வழங்கும் நிறுவனமாக தேசிய உற்பத்தித் திறன் செயலகம் மாறியதையடுத்து, இந்த சான்றிதழ் திட்டம் ஆரம்பிக்கப்பட்டது.
2025 ஆம் ஆண்டிற்காக 9 பேர் Certified Productivity Specialist ஆகவும், 34 பேர் Certified Productivity Professional ஆகவும் சான்றிதழ் பெற்றனர்.
இந்த திட்டத்தின் மூலம், உற்பத்தித் திறன் ஆலோசனை சேவைகளை வலுப்படுத்தவும், தேசிய உற்பத்தித் திறனை மேம்படுத்தவும் இலக்கு வைக்கப்பட்டுள்ளது.
APO உறுப்பினரான 21 நாடுகளில், இந்த சான்றிதழ் வழங்கும் 12வது நாடாக இலங்கை மாறியுள்ளது. மலேசியா, இந்தியா, சிங்கப்பூர், தாய்லாந்து உள்ளிட்ட பல நாடுகள் ஏற்கனவே இந்த திட்டத்தை நடைமுறைப்படுத்தி வருகின்றன.
இங்கு உரையாற்றிய ஜயசுந்தரா, டிட்வா சூறாவளியால் சுமார் 550 ஏற்றுமதியாளர்கள் பாதிக்கப்பட்டதாக தெரிவித்தார்.
எனினும், இந்த ஆண்டிற்கான 18 பில்லியன் அமெரிக்க டொலர் ஏற்றுமதி இலக்கை அடைய முடியும் என அவர் நம்பிக்கை வெளியிட்டார்.
மேலும், தற்போது சுமார் 98.94 பில்லியன் அமெரிக்க டொலராக உள்ள இலங்கை பொருளாதாரத்தை 2030 ஆம் ஆண்டுக்குள் 300 பில்லியன் அமெரிக்க டொலராக உயர்த்த தேவையான அடித்தளம் ஏற்கனவே அமைக்கப்பட்டுள்ளதாக கூறினார்.
உற்பத்தித் திறன் தான் பொருளாதார வளர்ச்சியின் முக்கிய காரணம் என்றும், அனைத்து துறைகளிலும் உற்பத்தித் திறன் கலாச்சாரத்தை வளர்ப்பதே நீடித்த வளர்ச்சிக்கான ஒரே வழி என்றும் அவர் வலியுறுத்தினார்.
இந்த நிகழ்வில் அமைச்சின் உயர் அதிகாரிகள், தேசிய உற்பத்தித் திறன் செயலக அதிகாரிகள் மற்றும் அரசாங்கம், தனியார் துறை பிரதிநிதிகள் கலந்து கொண்டனர்.
