கேரளா: பகடிவதை காரணமாக மகன் உயிரிழந்ததாக தாய் குற்றச்சாட்டு

கேரளாவின் கொச்சியில் 15 வயது பள்ளி மாணவன் தற்கொலை செய்து கொண்ட சில வாரங்களுக்குப் பிறகு, அவரது தாயார், தனது மகன் ராகிங் (பகடி வதை) காரணமாகி உயிரிழந்துள்ளதாக குற்றம் சாட்டியுள்ளார்.

இன்ஸ்டாகிராமில் வெளியிடப்பட்ட அறிக்கையில், தனது மகன் மிஹிர் அகமது அடித்து, வார்த்தைகளால் திட்டி, கழிப்பறை இருக்கையை நக்க கட்டாயப்படுத்தியதாக ராஜ்னா பிஎம் குற்றம் சாட்டியுள்ளார்.

போலீசார் தற்கொலை வழக்குப் பதிவு செய்துள்ளனர், ஆனால் மிஹிரின் தாயார், முதல்வர் பினராயி விஜயனின் அலுவலகத்திற்கும் கேரள காவல்துறைத் தலைவருக்கும் கடிதம் எழுதி, தனது மகனின் மரணம் குறித்து உடனடி மற்றும் பாரபட்சமற்ற விசாரணை நடத்தக் கோரி தெரிவித்துள்ளார்.

பள்ளியிலிருந்து திரும்பிய ஒரு மணி நேரத்திற்குப் பிறகு, கொச்சியின் திரிபுனிதாராவில் உள்ள 26வது மாடி குடியிருப்பில் இருந்து குதித்து ஜனவரி 15 அன்று மிஹிர் தற்கொலை செய்து கொண்டார்.

“அவரது மரணத்திற்குப் பிறகு, மிஹிர் ஏன் இவ்வளவு கடுமையான நடவடிக்கை எடுத்தார் என்பதைப் புரிந்துகொள்ள நானும் என் கணவரும் தகவல்களைச் சேகரிக்கத் தொடங்கினோம். அவரது நண்பர்கள், பள்ளித் தோழர்களுடனான உரையாடல்கள் மற்றும் சமூக ஊடக செய்திகளை மதிப்பாய்வு செய்ததன் மூலம், அவர் அனுபவித்த கொடூரமான யதார்த்தத்தை நாங்கள் வெளிப்படுத்தினோம். மிஹிர் பள்ளியிலும் பள்ளிப் பேருந்திலும் மாணவர்களின் ஒரு கும்பலால் கொடூரமான ராக்கிங், கொடுமைப்படுத்துதல் மற்றும் உடல் ரீதியான தாக்குதலுக்கு ஆளானார்,” என்று அவரது தாயார் தெரிவித்துள்ளார்.

“நாங்கள் சேகரித்த ஆதாரங்கள் படி. மிஹிர் தனது கடைசி நாளில் கூட அடித்து, வாய்மொழியாக துஷ்பிரயோகம் செய்யப்பட்டு, கற்பனை செய்ய முடியாத அவமானத்தைத் தாங்க வேண்டிய கட்டாயம் ஏற்பட்டது. அவர் வலுக்கட்டாயமாக கழிப்பறைக்கு அழைத்துச் செல்லப்பட்டார், கழிப்பறை இருக்கையை நக்கச் செய்துள்ளனர்” என்று தெரிவித்துள்ளார்.