இஸ்ரேல் தனது தாக்குதலை தீவிரப்படுத்தியது; ரெக்கெட்டுகளை வீசி ஹமாஸ் பதிலடி

இஸ்ரேல் தனது தாக்குதல்களை தீவிரப்படுத்தியதாலும், ஹமாஸ் ரெக்கெட்டுகள் மூலம் பதிலடி கொடுத்ததாலும் காசா மீண்டும் போரின் விளிம்பில் உள்ளது.

வியாழக்கிழமை காலை முதல் இஸ்ரேலிய தாக்குதல்களில் காசாவில் 85 பேர் கொல்லப்பட்டுள்ளனர். 133 பேர் காயமடைந்தனர்.

இறந்தவர்களில் தூங்கிக் கொண்டிருந்த பெண்களும் குழந்தைகளும் அடங்குவர்.

பல வீடுகள் இடிந்து விழுந்தன. ரஃபா, கான் யூனிஸ் மற்றும் பைத் லஹியாவில் உள்ள கட்டிடங்களின் இடிபாடுகளுக்கு அடியில் பலர் சிக்கிக் கொண்டுள்ளனர்.

வடக்கு காசாவில் உள்ள பெய்ட் லஹியாவிலும் இஸ்ரேலிய இராணுவம் தாக்குதலைத் தொடங்கியது. இதற்கிடையில், ஹமாஸின் ஆயுதப் பிரிவான அல்-கஸ்ஸாம் படைப்பிரிவு, டெல் அவிவ் மீது ராக்கெட்டுகளை வீசியதாக அறிவித்தது.

சியோனிசப் படைகள் பொதுமக்களுக்கு எதிராக நடத்திய படுகொலைகளுக்குப் பழிவாங்கும் நடவடிக்கையாக இந்தத் தாக்குதல் நடத்தப்பட்டதாக ஹமாஸ் மேலும் தெரிவித்துள்ளது.

இஸ்ரேலிய இராணுவம் நேற்று நெட்சாரிம் கடவையை மீண்டும் தனது கட்டுப்பாட்டில் கொண்டு வந்தது. போர் நிறுத்த ஒப்பந்தத்தைத் தொடர்ந்து இங்கிருந்து வெளியேறிய பிறகு இஸ்ரேலிய இராணுவம் கட்டுப்பாட்டைக் கைப்பற்றுவது இதுவே முதல் முறை.

இதன் மூலம், காசா வடக்கு மற்றும் தெற்கு எனப் பிரிக்கப்படுகிறது. தெற்குப் பகுதியில் உள்ளவர்கள் வடக்கு காசாவிற்குள் நுழைய அனுமதிக்கப்பட மாட்டார்கள் என்று இராணுவம் தெரிவித்துள்ளது.

வடக்கு காசாவிற்குள் நுழையவோ அல்லது வெளியேறவோ வடக்கு-தெற்கு நெடுஞ்சாலையைப் பயன்படுத்த வேண்டாம் என்றும் எச்சரிக்கை விடுக்கப்பட்டது.

இஸ்ரேலிய பிரதமர் பெஞ்சமின் நெதன்யாகு, ஆக்கிரமிக்கப்பட்ட மேற்குக் கரையில் ஒரு பெரிய மற்றும் சக்திவாய்ந்த முன்னணி உருவாக்கப்படும் என்றும், ஹமாஸுக்கு எதிரான ஒரு பெரிய தாக்குதலும் நடத்தப்படும் என்றும் எச்சரித்துள்ளார்.

செவ்வாய்க்கிழமை முதல் 500க்கும் மேற்பட்ட பாலஸ்தீனியர்கள் தாக்குதல்களில் கொல்லப்பட்டுள்ளனர்.

இவர்களில் 200 பேர் குழந்தைகள். சுமார் ஒன்பதாயிரம் பேர் காயமடைந்ததாக காசா சுகாதார அமைச்சகம் அறிவித்துள்ளது.