போர் நிறுத்த ஒப்பந்தத்தை மீறி லெபனானில் இஸ்ரேல் தாக்குதல்

நேற்று அமலுக்கு வந்த போர் நிறுத்த ஒப்பந்தத்தை மீறி லெபனானில் இஸ்ரேல் வான்வழித் தாக்குதல் நடத்தியது.

இஸ்ரேலிய ஆக்கிரமிப்புப் படைகள் தெற்கு லெபனானைத் தாக்கின. ஹிஸ்புல்லாவின் ராக்கெட் மையம் என்ற குற்றச்சாட்டின் பேரில் போர் விமானத்தைப் பயன்படுத்தி இந்தத் தாக்குதல் நடத்தப்பட்டது.

மேலும், தெற்கு லெபனானில் மக்கள் நடமாடும் சுதந்திரத்திற்கு இஸ்ரேல் இராணுவம் மீண்டும் கட்டுப்பாடுகளை விதித்துள்ளது.

இஸ்ரேல் இராணுவத் தளபதியின் அரபு செய்தித் தொடர்பாளர் அவிச்சாய் அத்ரேயி, லிட்டானி ஆற்றின் தெற்கே மாலை 5 மணி முதல் நாளை காலை 7 மணி வரை பயணம் செய்வதற்கு கடுமையான தடை விதித்துள்ளார்.

லெபனான் குடிமக்கள் மீது இஸ்ரேல் துப்பாக்கிச் சூடு நடத்துவது போர்நிறுத்த ஒப்பந்தத்தை மீறிய செயலாகும் என ஹிஸ்புல்லா பாராளுமன்ற உறுப்பினர் ஹசன் ஃபட்லால்லா சுட்டிக்காட்டியுள்ளார்.

லெபனானின் தெற்கு எல்லையில் உள்ள கிராமங்களுக்குத் திரும்பும் பொதுமக்கள் மீது இஸ்ரேல் துப்பாக்கிச் சூடு நடத்தியதாக அவர் கூறினார்.

எல்லைக் கிராமங்களுக்குத் திரும்புபவர்களை இஸ்ரேலியப் படைகள் தாக்குகின்றன என்று நாடாளுமன்றக் கூட்டத்திற்குப் பிறகு ஃபட்லால்லா ஊடகங்களுக்குத் தெரிவித்தார்.

லெபனானில் இஸ்ரேலும் ஹிஸ்புல்லாவும் 14 மாதங்களாக நீடித்த வன்முறையை தற்காலிகமாக நிறுத்துவதற்கான உள்ளூர் நேரம் புதன்கிழமை அதிகாலை 4:00 மணிக்கு அறிவிக்கப்பட்ட போர் நிறுத்தம் அமலுக்கு வந்தது.