ஜப்பானை பின்தள்ளிய இந்தியா : இனி சீனா மற்றும் அமெரிக்கா மாத்திரமே இலக்கு!

இந்தியா இந்த ஆண்டில் பொருளாதார ரீதியாக பாரிய வளர்ச்சியை பதிவு செய்துள்ளது.

இந்திய அரசாங்கத்தின் ஆண்டு இறுதி பொருளாதார மதிப்பாய்வின் கணக்கீடுகளின்படி, இந்தியா ஜப்பானை விஞ்சி உலகின் நான்காவது பெரிய பொருளாதார நாடாக மாறியுள்ளது.

தற்போதைய போக்குகளைப் பொறுத்தவரை, அடுத்த மூன்று ஆண்டுகளுக்குள் இந்தியா ஜெர்மனியை முந்தி உலகின் மூன்றாவது பெரிய பொருளாதார நாடாக  மாறும் என்று மதிப்பாய்வு தெரிவித்துள்ளது.

இந்தியாவின் மொத்த உள்நாட்டு உற்பத்தி ஏற்கனவே சுமார் $4.18 டிரில்லியன் (€3.55 டிரில்லியன்) ஐ எட்டியுள்ளது. மேலும் 2030 ஆம் ஆண்டுக்குள் $7.3 டிரில்லியனை எட்டும் என்று மதிப்பாய்வு தெரிவித்துள்ளது.

தற்போதுதைய வளர்ச்சி விகிதம் மற்றும் போக்குகளின் அடிப்படையில் பார்க்கும் போது இந்தியாவிற்கு போட்டியாக அமெரிக்கா மற்றும் சீனா மாத்திரமே இருக்கும். இவ்விரு நாடுகளை விட இந்தியா பின்தங்கியுள்ளது.

இந்தியாவின் உண்மையான மொத்த உள்நாட்டு உற்பத்தி 2025  நிதியாண்டின் இரண்டாவது காலாண்டில் 8.2% வளர்ச்சியடைந்தது, இது முந்தைய காலாண்டில் 7.8% ஆக பதிவாகியிருந்தமை சுட்டிக்காட்டத்தக்கது.

கடந்த நவம்பர் மாதத்தில் சரக்கு ஏற்றுமதி 38.13 பில்லியன் டொலராக உயர்ந்துள்ளது, இது ஜனவரி மாதத்தில் 36.43 பில்லியன் டொலராக இருந்தது, இதற்கு பொறியியல் பொருட்கள், மின்னணுவியல், மருந்துகள் மற்றும் பெட்ரோலிய பொருட்கள்  என்பன பெருமளவு பங்களித்துள்ளதாக சுட்டிக்காட்டப்பட்டுள்ளது.

இந்தியாவின் பொருளாதாரம் செழிப்பாக இருப்பதற்கான முக்கிய காரணிகள்

உலகளாவிய வர்த்தகம் மற்றும் கொள்கை நிச்சயமற்ற தன்மை தொடர்ந்தாலும், உள்நாட்டு தேவை, குறிப்பாக வலுவான தனியார் நுகர்வு ஆகியவற்றால் பொருளாதார வளர்ச்சி முதன்மையாக உந்தப்பட்டதாகக் கூறப்படுகிறது.

நிலையான கடன் ஓட்டங்கள் மற்றும் தொடர்ச்சியான சீர்திருத்தங்கள் இந்தியாவை நிலையான விரிவாக்கத்திற்கு நிலைநிறுத்தியுள்ளன என்றும் அரசாங்கம் குறிப்பிட்டுள்ளது.

2047 ஆம் ஆண்டுக்குள் உயர் நடுத்தர வருமான நிலையை அடையும் இலட்சியத்துடன், நாடு பொருளாதார வளர்ச்சி, கட்டமைப்பு சீர்திருத்தங்கள் மற்றும் சமூக முன்னேற்றத்தின் வலுவான அடித்தளங்களை உருவாக்கி வருகின்றமையும் குறிப்பிடத்தக்கது.