கை குலுக்காமல் சென்ற இந்தியா பாகிஸ்தான் கேப்டன்கள்

2025 ஆசியக் கோப்பை தொடருக்கு முன்னதாக அபுதாபியில் நடைபெற்ற கேப்டன்களின் பத்திரிகையாளர் சந்திப்பு, இந்திய கேப்டன் சூர்யகுமார் யாதவ் மற்றும் பாகிஸ்தான் கேப்டன் இடையே கைகுலுக்கல் இல்லாதது ஹாட் டாப்பிக்காக மாறியுள்ளது. இந்த சந்திப்பில், பல்வேறு அணிகளின் கேப்டன்கள் தங்கள் அணியின் தயாரிப்பு மற்றும் அணிகளின் உத்திகள் குறித்து பேசினர், ஆனால் இந்தியா-பாகிஸ்தான் கேப்டன்களின் இந்த நிகழ்வு பரபரப்பை ஏற்படுத்தியது.

ஐக்கிய அரபு அமீரக கேப்டன் முகமது வசீம், இந்தியா மற்றும் பாகிஸ்தான் அணிகளுடனான போட்டி குறித்து கூறுகையில், “நாங்கள் சமீபத்தில் சிறப்பாக ஆடி வருகிறோம். கடினமாக உழைத்துள்ளோம். இந்தியாவாக இருந்தாலும், பாகிஸ்தானாக இருந்தாலும், அன்றைய தினம் எங்களது சிறந்த ஆட்டத்தை வெளிப்படுத்துவோம்,” என்றார்.

ஆப்கானிஸ்தான் கேப்டன் ரஷித் கான், தங்கள் அணியின் உயர்வு குறித்து பேசுகையில், “பெரிய தொடருக்கு வரும்போது, நாங்கள் தயாராகவே வருகிறோம். சமீபத்தில் பல ஐசிசி தொடர்களில் ஆடியுள்ளோம். எளிமையாக விஷயங்களை அணுகுவதே எங்கள் உத்தி,” என்று தெரிவித்தார்.இந்திய கேப்டன் சூர்யகுமார் யாதவ், பாகிஸ்தானுக்கு எதிரான முக்கியமான போட்டி குறித்து பேசுகையில், “களத்தில் ஆக்ரோஷம் இல்லாமல் ஆட முடியாது. ஆக்ரோஷம் எப்போதும் இருக்கும். பாகிஸ்தானுக்கு எதிராக ஆடுவதற்கு நான் உற்சாகமாக உள்ளேன்,” என்றார்.

இந்தியா பேவரைட் அணியாக கருதப்படுவது குறித்து, “யார் சொன்னது? நான் எங்கும் அப்படி கேள்விப்படவில்லை. நீண்ட இடைவெளிக்குப் பின் டி20 ஆடுகிறோம், ஆனால் நாங்கள் நன்கு தயாராகியுள்ளோம்,” என்று நகைச்சுவையுடன் பதிலளித்தார். மேலும், ஐக்கிய அரபு அமீரக அணி குறித்து, “அவர்கள் உற்சாகமான கிரிக்கெட் ஆடுகின்றனர். சமீபத்திய தொடரில் இறுதி வரை வந்து, கோட்டைக் கடக்கவில்லை. இந்த ஆசியக் கோப்பையில் அவர்கள் வெற்றி பெற வாழ்த்துகிறேன். அவர்களுடன் ஆடுவதற்கு உற்சாகமாக உள்ளோம்,” என்றார்.

பத்திரிகையாளர் சந்திப்பில், சூர்யகுமாரின் தலைமுடி பாணி குறித்த கேள்வி இலகுவான தருணத்தை ஏற்படுத்தியது. இந்திய அணி, கடந்த வாரம் ஐக்கிய அரபு அமீரகத்திற்கு வந்த பின்னர் பயிற்சி ஆட்டங்களில் ஈடுபட்டு வருவதாகவும், ஆசியாவின் சிறந்த அணிகளுடன் ஆடுவது சவாலானது என்றும் சூர்யகுமார் கூறினார். இந்தியா, செப்டம்பர் 10 அன்று ஐக்கிய அரபு அமீரகத்துடனும், செப்டம்பர் 14 அன்று பாகிஸ்தானுடனும், செப்டம்பர் 19 அன்று ஓமனுடனும் குரூப்-நிலை போட்டிகளில் மோத உள்ளது