அமெரிக்காவின் போர் நிறுத்த திட்டத்தை மறுபரிசீலனை செய்ய உள்ள ஹமாஸ்; வரவேற்பு தெரிவித்துள்ளன அரபு, முஸ்லிம் நாடுகள்

காசா பகுதியில் போரை முடிவுக்குக் கொண்டுவருவதை நோக்கமாகக் கொண்ட அமெரிக்க ஆதரவுடன் கூடிய ஒரு திட்டத்தை ஹமாஸ் பெற்றுள்ளது, இதை கத்தார் மற்றும் எகிப்திய மத்தியஸ்தர்களால் முன்வைக்கப்பட்டது என்று ஹமாஸ் வட்டாரம் திங்களன்று தெரிவித்தது.

அமெரிக்க அதிபர் டொனால்ட் டிரம்ப், இஸ்ரேலிய பிரதமர் பெஞ்சமின் நெதன்யாகுவின் ஆதரவைப் பெற்ற இந்தத் திட்டம், தோஹாவில் நடந்த ஒரு சந்திப்பின் போது வழங்கப்பட்டது. கத்தார் பிரதமரும் எகிப்தின் பொது புலனாய்வு சேவைத் தலைவரும் இந்தத் திட்டத்தை ஹமாஸ் பேச்சுவார்த்தையாளர்களிடம் வழங்கியதாக ஹமாஸ் வட்டாரம் தெரிவித்துள்ளது.

அதிகாரப்பூர்வ பதிலை வெளியிடுவதற்கு முன்பு, இந்த திட்டத்தை நேர்மையான நோக்கத்துடன் ஆய்வு செய்வதாக ஹமாஸ் பிரதிநிதிகள் மத்தியஸ்தர்களிடம் கூறியதாக வட்டாரம் தெரிவித்துள்ளது.

எகிப்தின் அல் கஹேரா செய்தி தொலைக்காட்சி, எகிப்திய பாதுகாப்பு வட்டாரங்களை மேற்கோள் காட்டி, அமெரிக்க அமைதி முன்மொழிவை ஹமாஸுக்கு வழங்கப்பட்டதை உறுதிப்படுத்தி அறிக்கை வெளியிட்டது. எகிப்தும் பிற அரபு நாடுகளும் இந்தத் திட்டத்தில் தோஹாவில் உள்ள ஹமாஸிடம் வழங்குவதற்கு முன்பு பல திருத்தங்களைச் செய்ததாக அவ் அறிக்கை தெரிவிக்கிறது.

திங்கட்கிழமை முன்னதாக, இஸ்ரேலிய பிரதமர் பெஞ்சமின் நெதன்யாகு தனது பரந்த காசா அமைதித் திட்டத்திற்கு ஒப்புக்கொண்டதாக டிரம்ப் கூறினார். ஹமாஸ் இந்த திட்டத்தை ஏற்றுக்கொண்டால், மீதமுள்ள அனைத்து பணயக்கைதிகளையும் 72 மணி நேரத்திற்குள் விடுவிக்க வேண்டும் என்றும், ஹமாஸ் நிபந்தனைகளை ஏற்க வேண்டும் என்றும் டிரம்ப் மேலும் கூறினார்.

எவ்வாறாயினும், போராளிகள் இந்த திட்டத்தை நிராகரித்தால் ஹமாஸுக்கு எதிரான வேலையை இஸ்ரேல் முடித்துவிடும் என்று நெதன்யாகு எச்சரித்தார்.

இதற்கிடையில், மேற்குக் கரையில் உள்ள பாலஸ்தீன ஆணையம், அமெரிக்காவின் திட்டத்தை வரவேற்று, ஒரு விரிவான ஒப்பந்தத்தின் மூலம் காசா போரை முடிவுக்குக் கொண்டுவர அமெரிக்கா, பிராந்திய நாடுகள் மற்றும் கூட்டாளர்களுடன் இணைந்து பணியாற்றத் தயாராக இருப்பதாக அதிகாரப்பூர்வ WAFA செய்தி நிறுவனம் தெரிவித்துள்ளது.இந்தத் திட்டம், காசாவிற்கு போதுமான மனிதாபிமான உதவியை உறுதி செய்வதையும், பணயக்கைதிகள் மற்றும் கைதிகளை விடுவிப்பதை உறுதி செய்வதையும், பாலஸ்தீன மக்களைப் பாதுகாப்பதற்கான வழிமுறைகளை நிறுவுவதையும் உறுதி செய்வதாக ஆணையம் கூறியது.

சவுதி அரேபியா, ஜோர்டான், ஐக்கிய அரபு எமிரேட்ஸ், இந்தோனேசியா, பாகிஸ்தான், துருக்கி, கத்தார் மற்றும் எகிப்து ஆகிய நாடுகளின் வெளியுறவு அமைச்சர்கள் திங்கள்கிழமை தாமதமாக அமெரிக்க திட்டத்தை வரவேற்று ஒரு கூட்டு அறிக்கையை வெளியிட்டனர்.