கணேமுல்ல சஞ்சீவ கொலைவழக்கு – குற்றக்கும்பல்களை சேர்ந்த 09 பேருக்கு தொடர்பு!

நீதிமன்றத்தில் சுட்டுக் கொல்லப்பட்ட கணேமுல்ல சஞ்சீவவின் கொலையில் ஒழுங்கமைக்கப்பட்ட குற்றக்கும்பல்களை சேர்ந்த 09 பேர் ஈடுபட்டுள்ளதாக கொழும்பு குற்றப்பிரிவு இன்று (7) கொழும்பு நீதவான் நீதிமன்றத்திற்குத் தெரிவித்தது.

அவர்களில் நால்வர் தற்போது வெளிநாட்டுகளுக்கு  தப்பிச்சென்றுள்ளதாகவும் நீதிமன்றத்திற்கு தெரியப்படுத்தப்பட்டுள்ளது.

இந்தக் கொலையில் ஆறு ஒழுங்கமைக்கப்பட்ட குற்றவாளிகள் நேரடியாகத் தொடர்புடையவர்கள் என்றும் தகவல்கள் வெளியாகியுள்ளன.

கணேமுல்ல சஞ்சீவ கொலைச் சம்பவம் தொடர்பான வழக்கு இன்று கொழும்பு தலைமை நீதவான் அசங்க எஸ். போதரகம முன்னிலையில் விசாரணைக்கு எடுத்துக் கொள்ளப்பட்டபோது, ​​இந்த விடயங்கள் முன்வைக்கப்பட்டுள்ளன.

இன்றைய விசாரணையின்போது ​​பூசா சிறைச்சாலையில் தடுத்து வைக்கப்பட்டுள்ள ஐந்து சந்தேக நபர்கள் ஜூம் (ZOOM) தொழில்நுட்பம் மூலம் நீதிமன்றத்தில் ஆஜர்படுத்தப்பட்டனர்.

மேலும், சந்தேகநபர் இஷாரா செவ்வந்தி தப்பிச் செல்வதற்கு உதவியதாக சந்தேகத்தின் பேரில் விளக்கமறியலில் வைக்கப்பட்டிருந்த மூன்று ஆண் மற்றும் இரண்டு பெண் சந்தேகநபர்கள் சிறைச்சாலை அதிகாரிகளால் நீதிமன்றத்தில் ஆஜர்படுத்தப்பட்டனர்.

இதன்போது இதுவரை நடத்தப்பட்ட விசாரணைகளின் முன்னேற்றத்தைக் குறிக்கும் கூடுதல் அறிக்கையை கொழும்பு குற்றப்பிரிவு அதிகாரி நீதிமன்றத்தில் சமர்ப்பித்தார்.

தடுப்புக்காவலில் வைக்கப்பட்டுள்ள பல சந்தேக நபர்களிடம் விசாரணை நடத்தப்பட்டு, அவர்களிடம் வாக்குமூலங்கள் பதிவு செய்யப்பட்டுள்ளதாகவும், அதன் அடிப்படையில் மேலும் விசாரணைகள் நடத்தப்படும் என்றும் அந்த அதிகாரி கூறினார்.

இதற்கிடையில், காவலில் உள்ள சந்தேக நபர்கள் அதிகாரியால் கண்காணிக்கப்படுவார்கள் என்றும், சந்தேக நபர்கள் மீதான விசாரணைகளின் முன்னேற்றம் கோட்டை நீதவான் நீதிமன்றத்திற்கும், கொழும்பு நீதவான் நீதிமன்ற எண் 08க்கும் தெரிவிக்கப்படும் என்றும் நீதவான் தெரிவித்தார்.

முன்வைக்கப்பட்ட உண்மைகளைக் கருத்தில் கொண்ட நீதவான், தற்போது விளக்கமறியலில் வைக்கப்பட்டுள்ள சந்தேக நபர்களை எதிர்வரும் 21 ஆம் திகதிவரை மேலும் விளக்கமறியலில் வைக்க உத்தரவிட்டார்.

மேலும், வெளிநாடுகளுக்குத் தப்பிச் சென்ற சந்தேக நபர்களை உடனடியாகக் கைது செய்து நீதிமன்றத்தில் ஆஜர்படுத்துமாறு காவல்துறையினருக்கு நீதவான் மேலும் உத்தரவிட்டார்.