இலங்கை : ஆர்கானிக் முறையில் விளையும் மரக்கறிகளை கோரும் முன்னாள் ஜனாதிபதிகள்!

நுவரெலியாவில் விளையும்  ஆர்கானிக் மரக்கறிகளை தமது பாவனைக்காக பெற்றுக்கொள்ளும் வகையில் முன்னாள் ஜனாதிபதிகள் செயற்பட்டதாக ஜனாதிபதி அநுரகுமார திஸாநாயக்க குற்றம் சாட்டியுள்ளார்.

நுவரெலியாவில் நடைபெற்ற தேர்தல் பிரசாரக் கூட்டத்தில் உரையாற்றிய ஜனாதிபதி, பாதுகாப்பு அதிகாரிகளுக்கு உணவு தயாரிக்க நுவரெலியாவில் இருந்து கிடைக்கும் மரக்கறிகளை பயன்படுத்துமாறு ஜனாதிபதி செயலகத்தில் உள்ள அதிகாரிகளுக்கு பணிப்புரை விடுத்தார்.

இது தொடர்பில் மேலும் கருத்து வெளியிட்டுள்ள அவர், நுவரெலியாவிலுள்ள ஜனாதிபதி மாளிகைக்கு சொந்தமான காணியில் ஜனாதிபதியின் பாவனைக்காக கரிம மரக்கறிகள் பயிரிடப்பட்டுள்ளதாக அறிந்தேன்.

நுவரெலியாவிலிருந்து ஒவ்வொரு வெள்ளிக்கிழமையும் ஜனாதிபதி செயலகத்திற்கு 60 கிலோகிராம் எடையுள்ள இரண்டு காய்கறி மூட்டைகள் வருவதை அவதானித்தேன்.

ஒவ்வொரு வாரமும் நுவரெலியாவில் இருந்து ஆர்கானிக் காய்கறிகள் அனுப்பப்படுவதை அறிந்தேன், அந்த காய்கறிகளை பாதுகாப்பு அதிகாரிகளுக்கு தயாரிக்கும் உணவுக்காக பயன்படுத்துமாறு கேட்டுக் கொண்டேன்.

அந்தத் தலைவர்கள் சாதாரண மக்களுக்காக விளைவிக்கப்பட்ட காய்கறிகளைக்கூட உண்ணவில்லை எனத் தெரிவித்த ஜனாதிபதி, தேர்தலில் தோல்வியடைந்த பின்னரும் அவ்வாறான சலுகைகளை  எதிர்பார்க்கின்றனர் எனவும் தெரிவித்தார்.