செயற்கை நுண்ணறிவு செய்திகளில் தவறான தகவல்கள் – ஆய்வில் தகவல்

செய்திகள் தொடர்பான கேள்விகளுக்கு செயற்கை நுண்ணறிவு (AI) உதவிக் கருவிகள் பதிலளிக்கும்போது, அதிக அளவில் தவறான அல்லது நம்பகத்தன்மையற்ற தகவல்களை வழங்குவதாக ஒரு புதிய ஆய்வில் தெரியவந்துள்ளது.

பிபிசி ஊடகமும் ஐரோப்பிய ஒலிபரப்புச் சங்கமும் (European Broadcasting Union) இணைந்து நடத்திய இந்த ஆய்வில், ChatGPT, Copilot, ஜெமினி (Gemini) மற்றும் Perplexity ஆகிய முன்னணி AI கருவிகள் வழங்கிய சுமார் 3,000 பதில்கள் ஆராயப்பட்டன.

இவற்றில் 45 சதவீத பதில்களில் ஏதோ ஒரு குறைபாடு இருப்பது கண்டறியப்பட்டது.

செயற்கை நுண்ணறிவு அளித்த பதில்களில் மூன்றில் ஒரு பங்கு பதில்களில் முற்றிலும் தவறான தகவல்கள், பொய்யான குறிப்புகள் (False References), அல்லது முக்கியமாக வழங்க வேண்டிய தகவல்கள் விடுபட்டிருப்பது போன்ற பிரச்சினைகள் இருந்தன.

குறிப்பாக, கூகிள் நிறுவனத்தின் ஜெமினி (Gemini) கருவி வழங்கிய பதில்களில் 72 சதவீதம் இத்தகைய குறைபாடுகள் காணப்பட்டதாக ஆய்வு சுட்டிக்காட்டியுள்ளது.

செயற்கை நுண்ணறிவின் நம்பகத்தன்மை கேள்விக்குறியாக இருந்தாலும், பல பயனர்கள் இந்தக் கருவிகளை நம்பித் தினசரி செய்திகளைப் படித்து வருகின்றனர்.

முக்கியமான தரவுகளின்படி, 25 வயதுக்கு உட்பட்டவர்களில் 15 சதவீதமானோர் செய்திகளைத் தெரிந்துகொள்ள செயற்கை நுண்ணறிவு கருவிகளைப் பயன்படுத்துவதாக ஆய்வில் தெரியவந்துள்ளது.

இந்த ஆய்வுக் கருத்துகள் குறித்து கருத்து தெரிவித்த கூகிள் நிறுவனம், தங்கள் கருவிகளைத் தொடர்ந்து மேம்படுத்த இத்தகைய ஆய்வுகளின் பின்னூட்டங்கள் மிகவும் முக்கியம் என்று கூறியுள்ளது.

இந்த ஆய்வு, செய்திகளை அறிந்துகொள்வதில் செயற்கை நுண்ணறிவின் நம்பகத்தன்மை குறித்த தீவிரமான கேள்விகளை எழுப்பியுள்ளது.