சைபர் குற்றங்கள் அதிகரிப்பு – டிஜிட்டல் பாதுகாப்பு விழிப்புணர்வு கேள்விக்குறி

2025 ஆம் ஆண்டில் இலங்கை கணினி அவசர தயார்நிலைக் குழு (Sri Lanka CERT) பெற்றுள்ள சைபர் முறைப்பாடுகள் கணிசமாக அதிகரித்துள்ளதாக தெரிவிக்கப்பட்டுள்ளது.

கடந்த ஆண்டில்  12,650 க்கும் அதிகமான முறைப்பாடுகள் பதிவாகியுள்ளதாக தெரிவிக்கப்படுகிறது.
சமூக ஊடகங்களை தவறாக பயன்படுத்துவது சைபர் சம்பவங்களின் முக்கிய காரணமாக மாறியுள்ளதாக இலங்கை CERT தெரிவித்துள்ளது.

போலி கணக்குகள், சமூக ஊடக கணக்கு கையகப்படுத்துதல் மற்றும் ஒன்லைன் நிதி மோசடிகள் அதிகமாக முறைப்பாடளிக்கப்படும் பிரச்சினைகளாக உள்ளன.

ஒன்லைன் துன்புறுத்தல், தவறான உள்ளடக்கம் மற்றும் பெரியவர்களை இலக்குவைக்கும் பாலியல் பொருத்தமற்ற தகவல்கள் தொடர்பான முறைப்பாடுகளும் அதிகரித்துள்ளதாக இலங்கை CERT இன் முன்னணி தகவல் பாதுகாப்பு பொறியாளர் சாருகா தமுனுபொல தெரிவித்துள்ளார்.

தவறான தகவல்கள் மற்றும் ஏமாற்றும் ஒன்லைன் திட்டங்கள் பொதுமக்களுக்கு நிதி மற்றும் நற்பெயர் இழப்பை ஏற்படுத்துகின்றன என்றும் அவர் கூறினார்.

டிஜிட்டல் கொடுப்பனவுகள், மற்றும் சமூக ஊடக பயன்பாடு அதிகரிக்கும் நிலையில், சைபர் குற்றவாளிகள் புதிய மற்றும் நுட்பமான முறைகளை பயன்படுத்தி மக்களை குறிவைப்பதாக நிபுணர்கள் எச்சரிக்கின்றனர்.

குறிப்பாக இளைஞர்கள், மூத்த குடிமக்கள் மற்றும் புதிய இணைய பயனர்கள் அதிக ஆபத்தில் உள்ளதாக தெரிவிக்கப்பட்டுள்ளது.

சைபர் அபாயங்களை குறைக்க, தனிப்பட்ட தகவல்களை பகிர்வதில் கவனம் செலுத்த வேண்டும் எனவும் சந்தேகமான இணைப்புகள் மற்றும் செய்திகளை சரிபார்க்க வேண்டும் எனவும் அறிவுறுத்தப்பட்டுள்ளது.

இதேவேளை வலுவான கடவுச்சொற்கள் மற்றும் இரண்டு காரணி அங்கீகாரத்தை பயன்படுத்த வேண்டும் எனவும் இலங்கை CERT அறிவுறுத்துகிறது.

தேசிய சைபர் பாதுகாப்பை வலுப்படுத்த சட்ட அமலாக்க அமைப்புகள் மற்றும் பிற பங்குதாரர்களுடன் இணைந்து இலங்கை CERT செயல்பட்டு வருகிறது.

சைபர் சம்பவங்களை உடனடியாக முறைப்பாடளிப்பது அவற்றை விரைவாக கட்டுப்படுத்த உதவும் என்றும் நிறுவனம் தெரிவித்துள்ளது.

பொதுமக்கள் உதவிக்காக 101 என்ற ஹாட்லைன் மூலம் அல்லது report@cert.gov.lk  என்ற மின்னஞ்சல் முகவரிக்கு தகவல்களை அனுப்ப முடியும் என தெரிவிக்கப்பட்டுள்ளது.