ஆஸ்திரேலியாவில் அறிமுகம் செய்யப்படவுள்ள பேபி பிரியா சட்டம் – அரசாங்கம் எடுத்த நடவடிக்கை

ஆஸ்திரேலிய நாடாளுமன்றத்தில் பேபி பிரியா என்ற சட்டமூலம் முன்வைக்கப்பட்டுள்ளது.

பிறந்த ஆறு வாரங்களுக்கு பின்னர் இறந்த பேபி பிரியா என்ற குழந்தையின் நினைவாக இந்தப் புதிய சட்டம் பெயரிடப்பட்டுள்ளது.

குழந்தையை இழந்த தாயின் ஊதியத்துடன் கூடிய மகப்பேறு விடுப்பு அவரது நிறுவன உரிமையாளரால் ரத்து செய்யப்பட்டது, இது அவருக்கு மன அழுத்தத்தை ஏற்படுத்தியுள்ளது. இது தொடர்பாக சமூகத்தில் விவாதமும் நடந்துள்ளது.

குழந்தையை இழந்த பிறகு முதலாளியின் நடத்தை ஏற்றுக்கொள்ள முடியாதது எனவும் பேபி பிரியா என்ற புதிய சட்டமூலம் அறிமுகப்படுத்தப்படும் எனவும் பிரதமர் அந்தோணி அல்பானீஸ் நாடாளுமன்றத்தில் கூறினார்.

குழந்தையை இழந்தது எந்தவொரு பெற்றோருக்கும் தாங்க முடியாத வேதனையாகும், மேலும் அத்தகைய நேரத்தில் அவர்களின் வேலைவாய்ப்பு பாதிக்கப்படக்கூடாது என்று வேலைவாய்ப்பு மற்றும் சேவைகள் அமைச்சர் அமண்டா ரிஷ்வொர்த் தெரிவித்துள்ளார்.

ஒரு குழந்தை இறந்தாலோ அல்லது இறந்தே பிறந்தாலோ முதலாளியால் வழங்கப்படும் ஊதியத்துடன் கூடிய பெற்றோர் விடுப்பை ரத்து செய்ய முடியாது. தேவைப்பட்டால் முதலாளியும் பணியாளரும் பொறுப்புகளில் மாற்றங்களை பேச்சுவார்த்தை நடத்தலாம் என புதிய சட்டமூலம் பரிந்துரை செய்துள்ளது.

இந்தச் சட்டத்தை ஆதரிக்கும் ஆஸ்திரேலிய சேவைகள் சங்கம், ஒரு குழந்தையை இழந்த பிறகு எந்தவொரு பெற்றோரும் வேலைக்குத் திரும்பவோ அல்லது நிதி நெருக்கடியை எதிர்கொள்ளவோ ​​கட்டாயப்படுத்தப்படக்கூடாது என்று கூறுகிறது.