கூகுளின் பிக்சல் 4, பிக்சல் பட்ஸ் ப்ரோ மற்றும் 2 ஏ அறிமுகம்

கூகுள் நிறுவனத்தின் ‘Made by Google’ நிகழ்வு, ஆகஸ்ட் 20-ஆம் தேதி நியூயார்க் நகரில் நடைபெற்றது. இந்த நிகழ்வில், Pixel Watch 4, Pixel Buds Pro 2 மற்றும் Pixel Buds 2a ஆகிய சாதனங்கள் அறிமுகப்படுத்தப்பட்டன. இந்த புதிய தயாரிப்புகள் தனித்துவமான வடிவமைப்புகள் மற்றும் மேம்பட்ட அம்சங்களுடன் பயனர்களின் அனுபவத்தை மேம்படுத்தும் நோக்கில் உருவாக்கப்பட்டுள்ளன.

பிக்சல் சீரிஸின் புதிய ஸ்மார்ட் வாட்ச், பிக்சல் வாட்ச் 4 ஆகும். இது முதல்முறையாக ‘Google Actua 360’ டிஸ்ப்ளேவை 10% கூடுதல் செயலில் உள்ள பரப்பளவிலும், 16% சிறிய பெஸல்களிலும் கொண்டுள்ளது. இது முந்தைய மாடலை விட 50% பிரகாசமானது, 3000 நிட் டிஸ்ப்ளே கொண்டது. இந்த வாட்ச், ஸ்னாப்டிராகன் W5 ஜென் 2 பிராசஸர் மற்றும் ML-சார்ந்த கோ-பிராசஸர் ஆகியவற்றால் இயக்கப்படுகிறது. இந்த வாட்ச்சின் டிஸ்ப்ளே மற்றும் பேட்டரியை மாற்ற முடியும். இதுவே Pixel Watch தொடரில் முதல் முறையாகும்.

Material 3 Expressive என்ற புதிய தொழில்நுட்பம், வாட்ச் டிஸ்ப்ளேவிற்கு மேலும் உயிரோட்டத்தை அளிக்கிறது. இது மிக துடிப்பான வண்ணங்கள், கவர்ச்சியான கடிகார முகப்புகள் மற்றும் வாசிக்க எளிதான பயனர் இடைமுகத்தை வழங்குகிறது. ஸ்பீக்கர், 15% வலுவான புதிய ஹேப்டிக் எஞ்சின், ஜெமினியுடன் சிறந்த அனுபவத்தை வழங்குகின்றன. இந்த வாட்ச், பயனரின் தூக்கத்தைக் கண்காணிக்கவும், உடல் வெப்பநிலையை அளவிடவும், நிகழ்நேர சைக்கிள் ஓட்டும் புள்ளிவிவரங்கள், தனிப்பயனாக்கப்பட்ட தானியங்கி கண்காணிப்பு மற்றும் புதிய உடற்பயிற்சி விருப்பங்களை வழங்கவும் உதவுகிறது. இதில் ஜெமினி மூலம் உருவாக்கப்பட்ட ஏஐ ஹெல்த் கோச் வசதியும் உள்ளது.

41 மிமீ வாட்சில் 30 மணிநேரமும், 45 மிமீ வாட்சில் 40 மணிநேரமும் பேட்டரி ஆயுள் கிடைக்கிறது. பேட்டரி சேவர் மோடில், இதன் பேட்டரி முறையே 2 முதல் 3 நாட்கள் வரை நீடிக்கும். பிக்சல் வாட்ச்-ஐ 15 நிமிடங்களில் 50% வரை சார்ஜ் செய்ய முடியும். பிக்சல் வாட்ச் 4 LTE-ல், அவசர காலங்களில் பயன்படுத்தக்கூடிய செயற்கைக்கோள் இணைப்பு வசதி உள்ளது. பயனர் ஆஃப்லைனில் இருந்தாலும், செயற்கைக்கோள் நெட்வொர்க் வழியாக அவசர சேவைகளைத் தொடர்பு கொண்டு, அவர்களின் இருப்பிடத்திற்கு உதவி அனுப்பும் என்று கூகுள் கூறுகிறது. இதன் விலை 349 அமெரிக்க டாலர் முதல் தொடங்குகிறது.

கூகுள் நிகழ்வில், பிக்சல் பட்ஸ் ப்ரோ 2 பல புதிய அம்சங்களுடன் மேம்படுத்தப்பட்டுள்ளன. இதில் ஆக்டிவ் நாய்ஸ் கேன்சலேஷன் (ANC), ட்ரான்ஸ்பரன்சி மோட், மற்றும் காது அழுத்தத்தைக் குறைக்கும் வசதி ஆகியவை உள்ளன. மேலும், இந்த இயர்பட்ஸை அதன் கேஸ் மூலம் எளிதாகக் கண்டுபிடிக்க ஒரு புதிய வசதி சேர்க்கப்பட்டுள்ளது. இதில் 3 மைக்ரோஃபோன்கள், இயக்கத்தைக் கண்டறியும் ஆக்சலரோமீட்டர் மற்றும் கைரோஸ்கோப் ஆகியவை உள்ளன. பயனர்கள் தலையை ஆட்டுவதன் மூலம் அழைப்புகளை ஏற்கலாம் அல்லது நிராகரிக்கலாம். இது Tensor A1 சிப்செட் மூலம் இயக்கப்படுகிறது.

ஒருமுறை சார்ஜ் செய்தால் 12 மணிநேரம் வரையிலும், கேஸுடன் 48 மணிநேரமும் கேட்கும் நேரத்தை வழங்குகிறது. ANC ஆஃப் செய்யும்போது, இது 8 மணிநேரம் வரையிலும், கேஸுடன் 30 மணிநேரமும் கேட்கும் நேரத்தை வழங்குகிறது. இதன் விலை 229 அமெரிக்க டாலர். Porcelain, Iris, Hazel, Wintergreen, Peony, மற்றும் Moonstone ஆகிய 6 வண்ணங்களில் இது கிடைக்கிறது.

கூகுளின் புதிய வயர்லெஸ் இயர்பட்ஸான Pixel Buds 2a-வும் அறிமுகப்படுத்தப்பட்டுள்ளது. இது கூகுளின் Tensor A1 சிப்பால் இயக்கப்படுகிறது, இது ஜெமினி ஏஐக்கான ஹேண்ட்ஸ்-ஃப்ரீ அணுகலை வழங்குகிறது. இதில் ANC தொழில்நுட்பமும் ஒருங்கிணைக்கப்பட்டுள்ளது. ANC ஆன் செய்த நிலையில், இது 7 மணிநேரம் கேட்கும் நேரத்தையும், கேஸுடன் 20 மணிநேரமும் வழங்குகிறது. ANC ஆஃப் செய்த நிலையில், இது 10 மணிநேரம் வரையிலும், கேஸுடன் 27 மணிநேரமும் இயங்கும். வெறும் 5 நிமிட சார்ஜிங்கில் ஒரு மணிநேரம் வரை இசையைக் கேட்க முடியும். காணாமல் போன இயர்பட்ஸைக் கண்டுபிடிக்க FindHub என்ற வசதி உள்ளது. இது IP54 மதிப்பீட்டுடன், நீர் மற்றும் வியர்வைக்கு எதிர்ப்புத் திறன் கொண்டது. இதில் 2 மைக்ரோஃபோன்கள் உள்ளன. இதன் விலை $129. இது இரண்டு வண்ணங்களில் கிடைக்கிறது.