இந்தியா மீது குற்றச்சாட்டை – WCL தொடரில் இருந்து விலகிய பாகிஸ்தான்!

உலக சாம்பியன்ஷிப் ஆஃப் லெஜண்ட்ஸ் (WCL) டி20 கிரிக்கெட் தொடரில் இனி பங்கேற்கப் போவதில்லை என்று பாகிஸ்தான் கிரிக்கெட் வாரியம் (பிசிபி) அறிவித்துள்ளது.

இங்கிலாந்தில் நடைபெற்று வரும் இந்தத் தொடரில், இந்திய சாம்பியன்ஸ் அணி, லீக் சுற்றில் ஜூலை 20, 2025 அன்று பாகிஸ்தானுக்கு எதிராக விளையாட மறுத்து விலகியதைத் தொடர்ந்து, இரு அணிகளுக்கும் புள்ளிகள் பிரித்து வழங்கப்பட்டன. இது WCL நிர்வாகம் பாரபட்சமாக நடந்து கொண்டதாக பாகிஸ்தான் குற்றம்சாட்டியுள்ளது.

மேலும், ஜூலை 31, 2025 அன்று நடைபெறவிருந்த முதல் அரையிறுதிப் போட்டியில் இந்திய சாம்பியன்ஸ் அணி, பாகிஸ்தான் சாம்பியன்ஸுக்கு எதிராக விளையாட மறுத்து விலகியதால், பாகிஸ்தான் அணி விளையாடாமலே இறுதிப்போட்டிக்கு தகுதி பெற்றது. இந்திய அணியின் மறுப்புக்கு, ஜம்மு-காஷ்மீரில் நடந்த பஹல்காம் தாக்குதல் காரணமாக எழுந்த அரசியல் பதட்டங்கள் காரணமாகக் கூறப்பட்டது. இந்திய வீரர்களான ஷிகர் தவான், ஹர்பஜன் சிங், சுரேஷ் ரெய்னா, இர்ஃபான் பதான், மற்றும் யூசுப் பதான் ஆகியோர் இந்தப் போட்டியில் இருந்து விலகியதாக அறிவிக்கப்பட்டது.

பாகிஸ்தான் கிரிக்கெட் வாரியம், WCL நிர்வாகத்தின் முடிவுகளை “பாரபட்சமானவை” என்று விமர்சித்து, இந்திய அணியின் புறக்கணிப்பு தொடரின் நியாயத்தை பாதித்ததாகக் குற்றம்சாட்டியுள்ளது. “இந்தியாவின் மறுப்பு, தொடரின் விதிகளை மீறுவதாக உள்ளது. இதனால், பாகிஸ்தான் அணிக்கு நியாயமான வாய்ப்பு மறுக்கப்பட்டது,” என்று பிசிபி வெளியிட்ட அறிக்கையில் தெரிவித்தது. இதனைத் தொடர்ந்து, எதிர்கால WCL தொடர்களில் பாகிஸ்தான் அணி பங்கேற்காது என்று முடிவு செய்யப்பட்டுள்ளது.

இந்த முடிவு, இந்தியா-பாகிஸ்தான் இடையேயான கிரிக்கெட் உறவில் மேலும் பதட்டத்தை ஏற்படுத்தியுள்ளது. WCL தொடரின் முக்கிய ஸ்பான்சர்களில் ஒருவரான இந்தியாவைச் சேர்ந்த ‘ஈஸ்மைட்ரிப்’ நிறுவனமும் இந்தியா-பாகிஸ்தான் அரையிறுதிப் போட்டியில் இருந்து விலகியது, இது மேலும் சர்ச்சையை அதிகரித்தது.