இலங்கை வரும் இந்திய நிதி அமைச்சர்

இந்திய நிதியமைச்சர் நிர்மலா சீதாராமன் மூன்று நாள் உத்தியோகபூர்வ பயணமாக நாளை (நவம்பர் 01) இலங்கைக்கு விஜயம் செய்யவுள்ளதாக இந்திய அரசாங்கம் வெளியிட்டுள்ள அறிக்கையில் தெரிவிக்கப்பட்டுள்ளது.

இந்திய வம்சாவளித் தமிழர்கள் (IOTs) இலங்கைக்கு வருகை தந்ததன் 200வது ஆண்டு நிறைவை நினைவுகூரும் வகையில், இலங்கை அரசு ஏற்பாடு செய்துள்ள ‘நாம் 200’ நிகழ்ச்சியில், அமைச்சர் சீதாராமன் சிறப்பு விருந்தினராக கலந்துகொண்டு சிறப்புரை ஆற்றுகிறார்.

இந்திய நிதியமைச்சர் இந்தியா ஸ்ரீலங்கா வர்த்தக உச்சி மாநாட்டில் ‘இணைப்பை மேம்படுத்துதல்: செழுமைக்கான கூட்டாண்மை’ என்ற தொனிப்பொருளில் முக்கிய உரையையும் நிகழ்த்துவார்.

கொழும்பில் உள்ள ஹோட்டல் தாஜ் சமுத்ராவில் நவம்பர் 02 அன்று இந்திய தொழில் கூட்டமைப்பு (CII), இந்தோ-இலங்கை வர்த்தக மற்றும் தொழில் சம்மேளனம் மற்றும் சிலோன் வர்த்தக சம்மேளனம் இணைந்து இந்நிகழ்வை ஏற்பாடு செய்துள்ளன.

உத்தியோகபூர்வ விஜயத்தின் ஒரு பகுதியாக, அமைச்சர் சீதாராமன் ஜனாதிபதி ரணில் விக்ரமசிங்க மற்றும் பிரதமர் தினேஷ் குணவர்தன ஆகியோருடன் இருதரப்பு கலந்துரையாடலில் ஈடுபடவுள்ளார்.

நவம்பர் 02 மற்றும் 03 ஆகிய திகதிகளில் முறையே திருகோணமலை மற்றும் யாழ்ப்பாணத்தில் SBI கிளைகளை அமைச்சர் சீதாராமன் திறந்து வைக்கிறார்.

அவர் தனது இலங்கை விஜயத்தின் போது கண்டி ஸ்ரீ தலதா மாளிகை (புனிதப் பல்லக்கு ஆலயம்), அனுராதபுரத்தில் உள்ள ஜெயஸ்ரீ மஹா போதி, திருகோணமலையில் உள்ள திருக்கோணேஸ்வரம் கோவில் மற்றும் யாழ்ப்பாணத்தில் உள்ள நல்லூர் கந்தசுவாமி கோவில் ஆகிய இடங்களுக்குச் செல்வார்.

மேற்கூறிய நிகழ்வுகளைத் தவிர, அமைச்சர் சீதாராமன் தனது பயணத்தின் போது லங்கா ஐஓசி எண்ணெய் தொட்டி பண்ணைகள், யாழ்ப்பாணம் கலாச்சார மையம் மற்றும் யாழ் பொது நூலகம் ஆகியவற்றை பார்வையிட உள்ளார்.