இலங்கை: தரம் 05 புலமைப்பரிசில் பரீட்சை! வினாத்தாள் கசிவு தொடர்பாக அரசாங்கத்தின் புதிய முடிவு

தரம் 5 புலமைப்பரிசில் பரீட்சை விடைத்தாள்கள் மேலும் கசிந்திருக்கக் கூடிய சாத்தியக்கூறுகள் இருப்பதாக பெற்றோரிடம் இருந்து முறைப்பாடுகள் எழுந்ததையடுத்து இரண்டு வாரங்களுக்கு மதிப்பீடு செய்வதை இடைநிறுத்துமாறு ஜனாதிபதி அனுரகுமார திஸாநாயக்க பணிப்புரை விடுத்துள்ளார்.

ஆரம்பத்தில் அறிவிக்கப்பட்ட மூன்று கேள்விகள் மாத்திரமன்றி, பரீட்சையில் இருந்து எட்டு கேள்விகள் கசிந்துள்ளதாக ஜனாதிபதியை சந்தித்த பெற்றோர்கள் குழு கூறியதாக அரசாங்கப் பேச்சாளர் விஜித ஹேரத் தெரிவித்தார்.

கசிவுக்கான ஆதாரங்களை வழங்குமாறு பெற்றோரிடம் ஜனாதிபதி கேட்டுள்ளதாகவும், மேலதிக விசாரணை வரை, மதிப்பீட்டு செயல்முறை இடைநிறுத்தப்படும் என்றும் அவர் கூறினார்.

அமைச்சர் விஜித ஹேரத் இடைநிறுத்தத்தை உறுதிப்படுத்தியதுடன், அதிகாரிகள் குற்றச்சாட்டுகளை தீவிரமாக எடுத்துக்கொள்கிறார்கள் என்று மீண்டும் வலியுறுத்தினார்.

இன்று ஊடகங்களுக்கு கருத்து தெரிவித்த அமைச்சர் விஜித ஹேரத், பொலிஸ் மற்றும் கல்வி அமைச்சின் விசாரணைகளில் மூன்று கேள்விகள் கசிந்தமை உறுதி செய்யப்பட்டுள்ளதாகவும், இதன் அடிப்படையில் கசிந்த வினாக்களுக்கு முழு புள்ளிகளை வழங்குவது குறித்து ஆராய நியமிக்கப்பட்ட நிபுணர் குழு தீர்மானித்ததாகவும் தெரிவித்தார்.

மேலும் கேள்விகள் கசிந்துள்ளதாக பெற்றோர்கள் கூறியுள்ள நிலையில், இது தொடர்பான கலந்துரையாடல் கல்வி அமைச்சரான ஜனாதிபதி மற்றும் பிரதமர் ஆகியோரின் பங்கேற்புடன் இடம்பெற்றதாக ஹேரத் தெரிவித்தார்.

முதற்கட்டமாக, தாள் குறியிடுதலை தற்காலிகமாக இடைநிறுத்துவதற்கு தீர்மானம் எடுக்கப்பட்டுள்ளதாகவும், மேலும் கேள்விகள் கசிந்துள்ளமைக்கான ஆதாரம் பெற்றோரிடமிருந்து கிடைத்தவுடன் மேலதிக நடவடிக்கைகள் எடுக்கப்படும் எனவும் அமைச்சர் ஹேரத் தெரிவித்தார்.