தோனியின் செயல் வியப்பில் ஆழ்த்தியது! ப்ரெவிஸ் புகழாரம்

சூப்பர் கிங்ஸ் (சிஎஸ்கே) அணியில் ஐபிஎல் 2025-ல் இணைந்த தென்னாப்பிரிக்க வீரர் டிவால்ட் ப்ரெவிஸ், முன்னாள் இந்திய கேப்டன் எம்எஸ் தோனியின் எளிமையான பண்புகளைப் புகழ்ந்து பேசியுள்ளார். ப்ரெவிஸ், காயமடைந்த வேகப்பந்து வீச்சாளர் குர்ஜப்னீத் சிங்கிற்கு பதிலாக, ஐபிஎல் சீசனின் இடையில் 2.2 கோடி ரூபாய்க்கு சிஎஸ்கே அணியில் இணைந்தார்.

ஏபி டி வில்லியர்ஸின் யூடியூப் சேனலில் பேசிய ப்ரெவிஸ், தோனியின் அறை எப்போதும் திறந்திருக்கும் என்றும், அவர் தூங்கும்போது மட்டுமே மூடப்பட்டிருக்கும் என்றும் கூறினார். இது குறித்து பேசிய அவர் “நான் பலமுறை தோனியின் அறையில் அவருடன் அமர்ந்து, கிரிக்கெட் பார்த்தோம், அவரது பொழுதுபோக்குகள் பற்றி பேசினோம். அவருடைய எளிமையும், வீரர்களுக்கு அவர் அளிக்கும் நேரமும் என்னை வியப்பில் ஆழ்த்தியது,” என்று ப்ரெவிஸ் தெரிவித்தார்.

தோனியின் மைதானத்திற்கு வெளியேயான நடவடிக்கைகள் மற்றும் அவரது அணுகுமுறை தனக்கு மிகவும் சிறப்பாக இருந்ததாக அவர் குறிப்பிட்டார்.சிஎஸ்கே அணி ஐபிஎல் 2025-ல் புள்ளிப்பட்டியலில் கடைசி இடத்தைப் பிடித்து ஏமாற்றமளித்தாலும், 22 வயதான ப்ரெவிஸ் தனது அதிரடி ஆட்டத்தால் ரசிகர்களை கவர்ந்தார். ஆறு இன்னிங்ஸ்களில் 225 ரன்கள் குவித்த அவர், 180 என்ற அபாரமான ஸ்ட்ரைக் ரேட்டுடன் இரண்டு அரைசதங்கள் அடித்தார். அவரது இந்த சிறப்பான ஆட்டம், அடுத்த சீசனிலும் சிஎஸ்கே அணியில் அவருக்கு இடம் உறுதியாக்கும் என்று எதிர்பார்க்கப்படுகிறது

மேலும், .ஐபிஎல் 2025-ல் சிஎஸ்கே அணி பிளே-ஆஃப் சுற்றுக்கு தகுதிபெறவில்லை என்றாலும், ப்ரெவிஸ் தனது முதல் சீசனில் தோனியுடன் பகிர்ந்த அனுபவங்களை மறக்க முடியாதவை என்று கூறினார். “தோனி ஒரு உண்மையான லெஜண்ட். அவருடன் அணியில் இருப்பது, அவரிடம் கற்றுக்கொள்வது மிகவும் சிறப்பு,” என்று அவர் உணர்ச்சிப்பூர்வமாக தெரிவித்தார். அடுத்த சீசனில் சிஎஸ்கே அணியை மறுசீரமைக்க திட்டமிடப்பட்டாலும், ப்ரெவிஸ் தொடர்ந்து அணியில் முக்கிய வீரராக இருப்பார் என்று கருதப்படுகிறது.