டேட்டிங் செயலியில் தனிப்பட்ட புகைப்படங்கள் கசியுமா…?

இன்று பலரும் பலவிதமான சோஷியல் மீடியா செயலிகளை பயன்படுத்தி வருகிறார்கள். சமீப ஆண்டுகளாக இளைஞர்களிடம் டேட்டிங் செயலிகள் பிரபலமாகி வருகின்றன.

இந்த செயலி மூலம் புதிய நபர்களை எளிதாக நட்பாக்கிக் கொள்ள முடியும். இந்நிலையில், நீங்கள் பயன்படுத்தும் டேட்டிங் செயலியின் புரொபைலில் வைப்பதற்காக பயன்படுத்தும் புகைப்படம் அல்லது உங்களுக்குப் பொருத்தமானவருக்கு அனுப்பும் புகைப்படங்கள் இணையத்தில் கசிய வாய்ப்புள்ளது என்றும், இதனால் நீங்கள் ஹேக்கர்களால் குறிவைக்கப்படும் அபாயம் உள்ளது.

எந்தவொரு பாஸ்வேர்டு பாதுகாப்பும் இல்லாமல், ஆன்லைனில் வெளிப்படையாக சேமிக்கப்பட்ட வெளிப்படையான கன்டென்ட் உட்பட, முக்கிய டேட்டிங் செயலிகளிலிருந்து 1.5 மில்லியன் புகைப்படங்களை ஆராய்ச்சியாளர்கள் கண்டுபிடித்துள்ளனர். இவை ஹேக்கர்கள் மற்றும் ஆன்லைனில் மிரட்டிப் பணம் பறிப்பவர்களுக்கு எளிதான இலக்காக அமைகின்றன.

BDSM People, Chica, Pink, Brish மற்றும் Translove போன்ற ஐந்து தளங்களிலிருந்து எடுக்கப்பட்ட இந்தப் புகைப்படங்களை இணைப்பு உள்ள எவரும் அணுக முடியும் வகையில் இருந்துள்ளது. இந்த தளங்களில் 800,000 முதல் 900,000 பேர் வரை யூசர்கள் இருப்பதாக பிபிசி தெரிவித்துள்ளது. தற்போது இந்தப் பிரச்சனை தீர்த்து வைக்கப்பட்டிருந்தாலும், இது எப்படி நடந்தது? அல்லது புகைப்படங்கள் ஏன் பாதுகாப்பற்ற நிலையில் விடப்பட்டன? என்பதற்கான எந்த விளக்கமும் வழங்கப்படவில்லை.

“நான் முதலில் சோதித்த செயலி BDSM People. அதில் நான் பார்த்த முதல் படத்தில் முப்பது வயதுள்ள ஒருவர் நிர்வாணமாக இருந்தார். அப்போதுதான் இந்த புகைப்படங்கள் உள்ள ஃபோல்டர்கள் ஒருபோதும் பொதுவில் இருந்திருக்கக் கூடாது என்பது தெளிவாகத் தெரிந்தது” என்கிறார் சைபர் நியூஸைச் சேர்ந்த நெறிமுறை ஹேக்கர் அராஸ் நசரோவாஸ். எந்த கடவுச்சொல்லும் இல்லாமல் இந்தப் புகைப்படங்களை எவ்வளவு எளிதாக அணுக முடிகிறது என்பதைப் பார்த்து அவர் அதிர்ச்சியடைந்தார்.

சுயவிவரப் படங்கள் மட்டுமின்றி, தனிப்பட்ட செய்திகளும் எளிதாக அணுகும் வகையில் உள்ளது. இது டேட்டிங் செயலி யூசர்களுக்கு மேலும் ஆபத்தை அதிகரித்துள்ளது. ஹேக்கர்கள் இந்தப் படங்களை வைத்து மிரட்டி பணம் பறிக்க பயன்படுத்தக்கூடும் என்பதால், யூசர்களுக்கு, குறிப்பாக தன்பாலினத்தவர்களை (LGBT) விரோதமாக பார்க்கும் நாடுகளில் உள்ளவர்களுக்கு குறிப்பிடத்தக்க ஆபத்தை விளைவிக்கும் என நசரோவாஸ் வலியுறுத்தினார்.

இதற்கிடையில் இந்த சிக்கலைத் தீர்க்க ஏற்கனவே நடவடிக்கை எடுத்துள்ளோம் என்றும் பயன்பாடுகளுக்கான கூடுதல் அப்டேட் வரும் நாட்களில் ஆப் ஸ்டோரில் வெளியிடப்படும் என்றும் டேட்டிங் செயலியின் நிறுவனத்தைச் சேர்ந்த செய்தித் தொடர்பாளர் கூறினார். எனினும், பலமுறை எச்சரிக்கைகள் விடுத்தும், நிறுவனம் தங்கள் இருப்பிடம் குறித்த கூடுதல் கேள்விகளுக்கோ அல்லது சிக்கலை சரிசெய்வதில் ஏற்பட்ட தாமதங்களுக்கோ பதிலளிக்கவில்லை.

இந்த சம்பவம் 2015-ம் ஆண்டு நடைபெற்ற ஆஷ்லே மேடிசன் ஹேக்கை நியாபகப்படுத்துகிறது. அதில் திருமணமானவர்களுக்கான காதல் உறவுகளைத் தேடும் டேட்டிங் தளத்திலிருந்து ஏராளமான வாடிக்கையாளர் தரவைத் தீங்கிழைக்கும் ஹேக்கர்கள் திருடினர்.