தென்கிழக்கு ஆசியாவில் இதய நோயால் ஒவ்வொரு நிமிடமும் 8 பேர் உயிரிழக்கின்றனர் – WHO

தென்கிழக்கு ஆசியாவில் ஏற்படும் உயிரிழப்புகளுக்கு இதய நோய்கள் முக்கிய காரணமாக அமைவதாக உலக சுகாதார அமைப்பு (WHO) தெரிவித்துள்ளது.

மேலும், இதய நோய் ஒவ்வொரு நிமிடமும் எட்டு பேரின் உயிரைப் பறிக்கிறது என்று ஆய்வில் அறியப்பட்டுள்ளது.

இதய நோய்கள் பற்றிய விழிப்புணர்வை ஏற்படுத்தவும், மேலும் உயிர்களைக் காப்பாற்றவும் மேம்படுத்தவும் முன்கூட்டியே கண்டறிவதன் முக்கியத்துவத்தை உணர்த்தவும், ஒவ்வொரு ஆண்டும் செப்டம்பர் 29 அன்று உலக இதய தினம் அனுசரிக்கப்படுகிறது.

“WHO தென்கிழக்கு ஆசிய பிராந்தியத்தில் ஒவ்வொரு நிமிடமும், எட்டு பேர் இருதய நோய்களால் இறக்கின்றனர். பிராந்தியத்தில் இருதய நோய் மரணத்திற்கு ஒரு முக்கிய காரணமாகும்” என்று WHO தென்கிழக்கு ஆசியாவின் பொறுப்பாளர் டாக்டர் கேத்தரினா போஹ்மே தெரிவித்துள்ளார்.

இருதய நோய்க்கான முக்கிய ஆபத்து காரணிகளில் உயர் இரத்த அழுத்தம், நீரிழிவு நோய், புகையிலை பயன்பாடு, மது அருந்துதல், உப்பு மற்றும் கொழுப்புகள் அதிகம் உள்ள ஆரோக்கியமற்ற உணவுகள் மற்றும் உடல் செயலற்ற தன்மை ஆகியவை அடங்கும்.

“தென்கிழக்கு ஆசிய பிராந்தியத்தில் உயர் இரத்த அழுத்தம் மற்றும் நீரிழிவு நோயால் பாதிக்கப்பட்டவர்களில் 85 சதவீதத்தினர் தங்கள் நிலைமைகளைக் கட்டுக்குள் வைத்திருக்கவில்லை” என்று போஹ்மே கவலையை வெளிப்படுத்தியுள்ளார்.