ஈரான் – பிரித்தானியா இடையே இராஜதந்திரச் சந்திப்பு

ஈரான் மற்றும் பிரித்தானியா ஆகிய நாடுகளுக்கு இடையே நீண்டகாலமாக நிலவி வரும் இராஜதந்திர விரிசல்களுக்கு மத்தியில், இரு நாட்டு வெளிவிவகார அமைச்சர்களும் நேரடிப் பேச்சுவார்த்தையில் ஈடுபட்டுள்ளனர்.

ஈரானிய வெளியுறவு அமைச்சர் அப்பாஸ் அரக்சி மற்றும் பிரிட்டிஷ் வெளியுறவு அமைச்சர் யெவெட் கூப்பர் ஆகியோருக்கு இடையே கடந்த வெள்ளிக்கிழமை இந்தத் தொலைபேசி உரையாடல் இடம்பெற்றதாக ஈரானிய அரசு ஊடகம் அறிவித்துள்ளது.

பரஸ்பர புரிந்துணர்வை வலுப்படுத்தவும், இரு நாடுகளுக்கும் பொதுவான நலன் சார்ந்த விடயங்கள் குறித்து பல்வேறு மட்டங்களில் ஆலோசனைகளைத் தொடரவும் இரு அமைச்சர்களும் இதன்போது உடன்பட்டுள்ளனர்.

ஈரானின் அணுசக்தி திட்டம் மற்றும் தெஹ்ரானில் தடுத்து வைக்கப்பட்டுள்ள மேற்கத்திய நாடுகளைச் சேர்ந்த கைதிகளின் நிலை குறித்து சர்வதேச ரீதியில் பதற்றம் நிலவி வரும் சூழலில், இந்த அரிய இராஜதந்திர ஈடுபாடு முக்கியத்துவம் வாய்ந்ததாகப் பார்க்கப்படுகிறது.