அமெரிக்க வரிவிதிப்பு தாக்கம் – கடும் நெருக்கடியில் ஆசிய உற்பத்தி வட்டாரம்

அமெரிக்க ஜனாதிபதி டொனல்ட் டிரம்ப் எடுத்துவரும் இடைவிடாத வரிவிதிப்பு நடவடிக்கைகள், தென்கிழக்கு ஆசிய உற்பத்தி வட்டாரத்தில் எதிர்மறை தாக்கங்களை ஏற்படுத்தி வருகின்றன.

அந்த வட்டார உற்பத்தியாளர்கள், வருங்கால வளர்ச்சி குறித்து குறைவான நம்பிக்கையுடன் எதிர்கொள்கின்றனர் என ‘எஸ் அண்ட் பி’ உலக கொள்முதல் மேலாளர்களின் குறியீட்டு அறிக்கை வெளியிடப்பட்டுள்ளது.

கொவிட்-19 பெருந்தொற்றுக்குப் பின்னர் தென்கிழக்கு ஆசிய உற்பத்தியாளர்களிடையே நம்பிக்கையின்மை அதிகரித்து வருகின்றது.

ஜூலை மாதத்தில் உற்பத்தி வளர்ச்சி இருந்தாலும், எதிர்கால வளர்ச்சி சாத்தியங்கள் குறைவாகவே காணப்படுகின்றன. இது 2020 ஜூலைக்குப் பிறகு பதிவான குறைந்த நம்பிக்கையான நிலை என குறிப்பிடப்படுகிறது.

2025ஆம் ஆண்டு ஏப்ரலில், ஜனாதிபதி டிரம்ப் ஆசிய வட்டார நாடுகளுக்கு விதிக்கப்பட்ட வரிகளை 10 முதல் 40 சதவீதம் வரை உயர்த்தினார். இதன் தொடர்ச்சியாக, சீனா, ஜப்பான் மற்றும் தென்கொரியாவைப் போன்ற முக்கிய ஏற்றுமதி நாடுகளின் தொழிற்சாலை உற்பத்தியில் சரிவு ஏற்பட்டது.

சீனாவின் உற்பத்திக் குறியீடு, ஜூன் மாதத்தில் 50.4ஆக இருந்த நிலையில், கடந்த மாதம் 49.5 ஆக குறைந்தது. குறியீடு 50ஐத் தாண்டினால் வளர்ச்சியைக் குறிக்கிறது; அதற்குக் கீழே வந்தால் சுருக்கத்தைக் குறிக்கும்.

PMI குறியீடு தொடர்பான ஆய்வு ஜூலை 10 முதல் 23 வரை நடத்தப்பட்டது. அமெரிக்காவும் தென்கொரியாவும் ஜூலை 30ஆம் தேதி செய்த வர்த்தக ஒப்பந்தத்துக்கு முன்னதாகவே இந்த ஆய்வு நடைபெற்றது. அந்த ஒப்பந்தத்தின் மூலம் தென்கொரியாவுக்கான வரி விகிதம் 25% இலிருந்து 15% ஆக குறைக்கப்பட்டது.

பிலிப்பீன்ஸ் மற்றும் வியட்னாமில் ஜூலை மாதத்தில் உற்பத்தி விரிவடைந்தது குறிப்பிடத்தக்கது. ஆனால், தைவான், இந்தோனீசியா மற்றும் மலேசியாவில் உற்பத்தி வீழ்ச்சி கண்டது. இது, வட்டார உற்பத்தியில் நிலவும் மாறுபாடுகளையும், வியாபார அழுத்தங்களின் தாக்கத்தையும் தெளிவாக காட்டுகிறது.

உலக நாடுகள் பெரும்பாலும் தென்கிழக்கு ஆசியாவை உற்பத்திப் பொருட்களுக்கு சார்ந்துள்ள நிலையில், அந்த வட்டாரம் முழுவதும் உற்பத்தியாளர்கள் வர்த்தக கொள்கைகளால் பெரும் அழுத்தங்களை எதிர்கொள்கின்றனர். அதிபர் டிரம்பின் புதிய வரிவிதிப்பு நடவடிக்கைகள், உலக உற்பத்தித் திட்டங்களில் மாறுதல்களைக் கொண்டு வரக்கூடிய சாத்தியத்தை உருவாக்கியுள்ளன.